Josh 22 - Ndebele Bible (iBhayibhili Elingcwele) 1978

Ialtare ngaseJordani

1UJoshuwa wasebiza abakoRubeni labakoGadi lengxenye yesizwe sabakoManase,

2wathi kubo: Likwenzile konke lokho uMose inceku yeNkosi eyalilaya khona, lalilalela ilizwi lami kukho konke engalilaya khona;

3kalibalahlanga abafowenu kulezinsuku ezinengi; kuze kube lamuhla linanzelele ukugcina ukulaya kweNkosi uNkulunkulu wenu.

4Khathesike iNkosi uNkulunkulu wenu ibanikile abafowenu ukuphumula njengokubathembisa kwayo. Ngakhoke buyelani emakhaya enu elizweni lakini, alinika lona uMose inceku yeNkosi ngaphetsheya kweJordani.

5Liqapheiise ukugcina umlayo lomthetho uMose inceku yeNkosi alilaya wona, ukuba lithande iNkosi uNkulunkulu wenu, lihambe endleleni zayo zonke, ligcine imilayo yayo, libambelele kuyo, liyikhonze ngenhliziyo yenu yonke langomoya wenu wonke.

6Wasebabusisa uJoshuwa ebayekela behamba, basuka baya emakhaya abo.

7Ingxenye yesizwe sakoManase uMose wayeyinike indawo eBashani; kodwa enye ingxenye uJoshuwa wayeyinike indawo phansi kwabafowabo elizweni ngasempumalanga kweJordani. Nxa uJoshuwa ebathumela emakhaya abo, wababusisa,

8wathi kibo: Buyelani emakhaya enu lilenotho enengi lenkomo ezinengi lesiliva legolide lethusi lensimbi lezigqoko ezinengi; lahlukaniselane impango yezitha zenu labafowenu.

9AbakoRubeni labakoGadi lengxenye yesizwe sakoManase babuyela emakhaya behlukana labakoIsrayeli eShilo elizweni laseKanani, baya elizweni laseGileyadi elaliyilizwe labo ababelinikwe nguMose ngomlayo weNkosi.

10Ekufikeni kwabo eGelilothi eliseKanani ngaseJordani abakoRubeni labakoGadi lengxenye yesizwe sakoManase bakha khona ialtare elikhulu ngaseJordani, lalilialtare elikhulu okumangalisayo.

11AbakoIsrayeli bezwa kuthiwa: AbakoRubeni labakoGadi lengxenye yesizwe sakoManase bakhile ialtare ngasemngceleni welizwe laseKanani eGelilothi ngaseJordani endaweni engeyabakoIsrayeli.

12Kwathi nxa abakoIsrayeli bekuzwa lokhu, ixuku lonke labantu labuthana eShilo ukuba lilwe labo.

13Bathumela kwabakoRubeni labakoGadi lengxenye yesizwe sakoManase elizweni laseGileyadi uFiniyasi indodana kaEleyazare umpristi,

14ehamba lenduna ezilitshumi, inye esizweni sinye sakoIsrayeli, yileyo laleyo iyinhloko yomuzi ezizweni zakoIsrayeli.

15Bafika kwabakoRubeni labakoGadi lengxenye yesizwe sakoManase elizweni laseGileyadi, bathi kibo:

16Ibandla lonke leNkosi lithi: Iyini linkohliso eliyenze kuNkulunkulu kaIsrayeli ekuphambukeni kwenu lamhla ekuyilandeleni iNkosi ngokuzakhela ialtare lamhla, lihlamuka iNkosi na?

17Khumbulani isono sethu sasePeyori esingazihlambululi kuso okwathi ngenxa yaso kwehlela phezu kwebandla leNkosi umkhuhlane. Sasisincinyane yini

18ukuba liphambuke lamhla ekuyilandeleni iNkosi na? Uba liyihlamuka iNkosi lamhla, izalithukuthelela lonke ibandla lakoIsrayeli kusasa.

19Kodwa uba ilizwe lenu lingcolile, chaphelani elizweni leNkosi lapho iTabernakeli leNkosi likhona, lizizuzele indawo phakathi kwethu; kodwa lingayihlamuki iNkosi loba lisenze thina siyihlamuke ngokuzakhela ialtare elingesilo ialtare leNkosi uNkulunkulu wethu.

20Khumbulani ukuthi uAkani indodana kaZera wenza okubi ngezinto ezinikelwe eNkosini, lolaka lwehlela phezu kwalo lonke ibandla labakoIsrayeli. Kabhubhanga yedwa ngenxa yobubi bakhe.

21AbakoRubeni labakoGadi lengxenye yesizwe sakoManase baphendula inhloko zezindlu zakoIsrayeli bathi:

22INkosi inguNkulunkulu wabonkulunkulu, iNkosi inguNkulunkulu wabonkulunkulu, yona iyazi, loIsrayeli kufanele akwazi. Uba bekuyikuhlamuka loba kuyikuphambuka eNkosini lingasiyekeli lamhla.

23Uba besizakhele ialtare ngoba siqonde ukuyitshiya iNkosi, loba sinikelele iminikelo yokutshiswa loba iminikelo yempuphu loba iminikelo yokuthula kulo, iNkosi uqobo kayiphindisele kithi.

24Kodwa sikwenze ngokwesaba ukuthi esikhathini esizayo abantwana benu bazakuthi kwabethu: Lilani leNkosi, uNkulunkulu kaIsrayeli na?

25Ngoba iNkosi ilenzile iJordani laba ngumngcele phakathi kwethu lani; lina bakoRubeni labakoGadi kalilasabelo eNkosini. Abantwana benu benze abethu ukuba bayekele ukuyikhonza iNkosi.

26Ngakhoke sasesisithi: Kasakheni ialtare lingabi ngelomnikelo wokutshiswa lelomhlatshelo,

27kodwa libe ngelobufakazi phakathi kwethu lani laphakathi kwezizukulwana zethu ezizayo, ukuba siyayikhonza iNkosi ngeminikelo yethu yokutshiswa langemihlatshelo langeminikelo yokuthula, funa abantwana benu bathi kwabethu esikhathini esizayo: Kalilasabelo eNkosini.

28Sasesisithi uba bazakutsho njalo kithi lasebantwaneni bethu esikhathini esizayo, sizakuthi: Khangelani umfanekiso wealtare leNkosi elakhiwa ngobaba bengalakheli iminikelo yokutshiswa lemihlatshelo, kodwa ukuba libe yibufakazi phakathi kwethu lani.

29Kakube khatshana lathi ukuba siyihlamuke iNkosi, lokuba siphambuke lamhla ekuyilandeleni ngokwakha ialtare lomnikelo wokutshiswa lomnikelo wempuphu lomhlatshelo, elingesilo ialtare leNkosi uNkulunkulu wethu elimi phambi kweTabernakeli layo.

30Kwathi lapho uFiniyasi umpristi lezinduna zebandla eziyizinhloko zemizi yakoIsrayeli ezazilaye bewezwa amazwi akhulunywa ngabakoRubeni labakoGadi labakoManase, abathokozisa kakhulu.

31UFiniyasi indodana kaEleyazare umpristi wasesithi kwabakoRubeni labakoGadi labakoManase: Lamhla siyazi ukuba iNkosi iphakathi kwethu, ngoba kalenzanga inkohliso eNkosini; libakhulule abakoIsrayeli esandleni seNkosi.

32UFiniyasi indodana kaEleyazare umpristi lezinduna babuyela eKanani ebantwini bakoIsrayeli bevela kwabakoRubeni labakoGadi elizweni leGileyadi, bababikela.

33Umbiko wabo wabathokozisa abakoIsrayeli, bambonga uNkulunkulu, bayekela ukukhuluma ngokubahlasela ukuba bachithe ilizwe ababehlala kulo abakoRubeni labakoGadi.

34AbakoRubeni labakoGadi balibiza ialtare lelo ngokuthi yiBufakazi, ngoba bathi: Liyibufakazi phakathi kwethu bokuba iNkosi inguNkulunkulu.