Hubo 7 - Ndebele Bible (iBhayibhili Elingcwele) 1978

Umkhuleko wokucela iNkosi ukuba yahlulele

1Nkosi, Nkulunkulu wami, ngiyaphephela kuwe;

ngisiza kubo bonke abangizingelayo, ungikhulule,

2funa bangidabule njengesilwane,

bangiklebhule, kungekho osizayo.

3Nkosi, Nkulunkulu wami, uba ngikwenzile lokho,

uba kukhona okubi ezandleni zami,

4uba ngiphindisele okubi kohlalisene lami ngokuhle,

ngayekela isitha sami esangihlasela ngaphandle kwecala,

5isitha sami kasingizingele singibambe,

sikunyathele phansi ukuphila kwami,

siwulahle phansi umphefumulo wami.

6Vuka, Nkosi, ngolaka lwakho,

uvuke ngenxa yentukuthelo yezitha zami.

Vuka, Nkulunkulu wami, wena umisile ukwahlulelwa.

7Umhlangano wezizwe kawukuhanqe,

wena uhlale esihlalweni sakho esiphakamileyo.

8INkosi iyahlulela izizwe.

Nkosi, ngahlulela ngokulunga kwami

langobuqotho obukimi.

9Kabuphele ububi bababi,

kodwa olungileyo umqinise,

wena ohlola ingqondo lenhliziyo,

onguNkulunkulu olungileyo.

10Isihlangu sami nguNkulunkulu osiza abaqotho enhliziyweni.

11UNkulunkulu ungumahluleli olungileyo,

unguNkulunkulu othukuthela insuku zonke.

12Uba umuntu engaphenduki,

uNkulunkulu uzalola umkhonto wakhe;

useligobile walibopha idandili lakhe,

13usezilungisile izikhali zakhe zokubulala,

wayenza imitshoko yakhe itshise njengomlilo.

14Khangela, omubi uyomula okubi,

akhulelwe yikona, azale amanga.

15Umba umgodi awutshonise,

abuye awele kuwo umhome awenzileyo.

16Ububi bakhe behlele phezu kwekhanda lakhe,

lesihluku sakhe sehlele enkanda yakhe.

17Ngizakuyibonga iNkosi ngokulunga kwayo,

ngihlabelele ibizo leNkosi ePhezukonke.