Jobe 2 - Ndebele Bible (iBhayibhili Elingcwele) 1978

1Kwathi futhi ngelinye ilanga afika amadodana kaNkulunkulu ukuma phambi kweNkosi, uSathane wafika kanye lawo.

2INkosi yathi kuSathane: Wenake, uvela ngaphi na? USathane wayiphendula iNkosi wathi: Ekuzulazuleni lomhlaba lokuhambahamba kuwo.

3INkosi yasisithi kuSathane: Uyiqaphele yini inceku yami uJobe ukuthi kakho onjengaye emhlabeni, ongelasici loqotho, owesaba uNkulunkulu, loxwaya okubi na? Usabambelele kubo ubuqotho bakhe, lanxa wangivusa ukuba ngimchithe ngeze.

4USathane wayiphendula iNkosi wathi: Isikhumba ngesikhumba! Konke umuntu alakho angakunikela ngokuphila kwakhe.

5Kodwa ake welule isandla sakho, uthinte ithambo lakhe lenyama yakhe; uzakukuthuka ebusweni bakho.

6INkosi yathi kuSathane: Khangela, usemandleni akho; utshiye ukuphila kwakhe kuphela.

7USathane wasephuma phambi kweNkosi, wamehlisela uJobe izilonda ezibhibhidlayo, kusukela enyaweni kwaze kwafika ekhanda.

8Wathatha udengezana, waziphala ngalo, wahlala esilotheni.

9Umkakhe wathi kuye: Lokhu usabambelele kubo ubuqotho bakho na? Mthuke uNkulunkulu, ufe.

10Kodwa yena wathi kuye: Ukhulumisa okowesifazana oyisithutha. Sizakwamukela okuhle kuphela esandleni sikaNkulunkulu, singamukeli lokubi na? Kukho konke lokhu uJobe konanga ngomlomo wakhe.

11Lapho abangane bakhe abathathu uElifazi waseTemani, loBilidadi waseShuhi, loZofari waseNama sebezwile ngakho konke lokhu okubi okumehleleyo, bafika kuye bevela ezindaweni zabo. Bavumelana ukuba bayemkhalela bamduduze.

12Lapho bembona bekhatshana, kabamazanga, baphakamisa amazwi abo bakhala, badabula izigqoko zabo, baphosa uthuli phezulu emakhanda abo.

13Bahlala phansi kanye laye insuku eziyisikhombisa lobusuku obuyisikhombisa, bengamkhulumisi ngoba bebona ukuthi uyafuthelwa kakhulu.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help