Jobe 30 - Ndebele Bible (iBhayibhili Elingcwele) 1978

UJobe ukhala ngokuhlupheka kwakhe okukhulu

1Kodwa khathesi abatsha kulami bayangihleka,

oyise babo engababona bengafanelanga ukuba ngibafake phakathi kwezinja ezelusa izimvu zami.

2Ingalo zabo ezilamandla zazingangisiza kanjani lokhu ukuqina kwabo kwasekuphelile na?

3Badla izimpande enkangala,

bechakiswe yikuswela lendlala.

4Bakha imibhida emunyu lamahlamvu ezihlahla,

badla impande zezihlahla.

5Baxotshwa phakathi kwabantu abamemeza emva kwabo njengemva kwesela.

6Bahlala ezigodini zezifula,

lezimbalwini zomhlaba lasemaweni.

7Bakhonya njengezinyamazana phakathi kwezihlahla,

bebuthana ndawonye ezixukwini,

8bayiziphukuphuku ezilahliweyo zaxotshwa phakathi kwabantu.

9Khathesi sengihaywa yibo,

sengiyisiga sabo.

10Ngiyabanenga, bema khatshana lami;

kabathikazi ukungikhafulela ngamathe.

11UNkulunkulu ukhulule intambo zami, wangithobisa,

lapho sebengibona kabazithinti.

12Ngakwesokunene sami bangihlasela belixuku,

balungisela ukungivimbezela.

13Bazivalile indlela zami zokubaleka,

kakho ongabavimbela ekungihlaseleni kwabo.

14Bafohlela esikhaleni esikhamisileyo;

ekuvulekeni kwesikhala batheleke phakathi;

15Ukwesaba kuyangehlela,

kuphephule ukuzimisela kwami njengomoya,

lethemba lami lokunqoba linyamalale njengamayezi.

16Ngakhoke khathesi umoya wami udungekile phakathi kwami,

losizi lungibamba insuku zonke.

17Ebusuku ubuhlungu buyafutha emathanjeni ami,

lokuqaqamba kakupheli emithanjeni yami.

18UNkulunkulu uyangibamba ngesiphika seyembe yami,

atshwabhanise izigqoko zami.

19UNkulunkulu ungiphosele odakeni,

senginjengothuli lomlotha.

20Ngiyakhala kuwe, Nkulunkulu, kodwa kawungiphenduli;

ngiyasukuma, kodwa kawunginanzi.

21Usuyisihluku kimi,

ngamandla esandla sakho uyangizingela.

22Uyangiphakamisela emoyeni,

ungikhweze kuwo,

ngiphoseke le lale phakathi kwesiphepha.

23Yebo, ngiyazi ukuba uzangifikisa ekufeni,

lasendaweni emiselwe bonke abaphilayo.

24Kodwa, nxa umuntu esiwa, keluli isandla sakhe na?

Ekuhluphekeni kwakhe kakhaleli ukusizwa na?

25Kangimkhalelanga yini owayelensuku ezilukhuni,

kangimhawukelanga yini owayengumyanga na?

26Kodwa kwathi ngilindele okuhle, kwavela okubi;

Kwathi ngilindele ukukhanya, kwafika umnyama.

27Inhliziyo yami idungekile, kayilakuphumula,

lensuku zosizi zingifikele.

28Ngihamba ngidanile, ngingelabangane;

ngisukuma ebandleni ngicele ukusizwa kuphela.

29Ngingumfowabo wamakhanka,

lomngane wezintshe.

30Isigogo sami siphenduke saba mnyama, siyayobuka kimi,

lamathambo ami ayatshisa.

31Umhubhe wami usulungiselwe isililo,

lomhlanga wami walungiselwa ilizwi labakhalayo.