Ingoma Yezingoma 4 - Ndebele Bible (iBhayibhili Elingcwele) 1978

Umyeni:

1Umuhle, wena sithandwa sami,

umuhle impela.

Amehlo akho anjengamajuba ngaphakathi kweveli lakho;

lenwele zakho zinjengomhlambi wembuzi

zisehla emawatheni aseGileyadi.

2Amazinyo akho amhlophe anjengomhlambi wezimvukazi ezigundiweyo

ezisand’ ukugeziswa;

zilamaphahla zonke,

kayikho leyodwa efelweyo.

3Indebe zakho zinjengentambo ebomvu,

lamazwi akho mahle.

Izihlathi zakho phakathi kweveli lakho

zinjengepomegranati elidatshuliweyo.

4Intamo yakho injengomphotshongo kaDavida

owakhiwe waba yinqaba,

okulengiswe kuwo amahawu ayinkulungwane,

wonke ayizihlangu zamaqhawe.

5Amabele akho amabili anjengabantwana ababili

abangamaphahla empala,

abadlayo phakathi kwemiduze.

6Emadabukakusa, kusapholile, kusesemnyama,

ngizakhwela entabeni yemure lasoqaqeni lwempepha.

7Umuhle ngokupheleleyo, wena sithandwa sami,

kakukho sici kuwe.

8Woza uvela eLebanoni, wena mlobokazi wami,

woza uvela eLebanoni.

Yehla engqongeni yaseAmana,

lasengqongeni yaseSeniri leyaseHermoni,

ezimbalwini zezilwane, lasezintabeni zezingwe.

9Ungamukile inhliziyo yami, dadewethu lomlobokazi wami,

ungamukile inhliziyo yami ngokungithi jeqe ngelihlo lakho,

langelilodwa lamangqongqo akho.

10Lumnandi kangaka uthando lwakho, dadewethu lomlobokazi wami!

Luhle kangakanani uthando lwakho kulewayini,

lephunga lamagcobo akho kulamakha wonke.

11Indebe zakho, mlobokazi wami, zimnandi njengenyosi,

lolimi lwakho lunjengochago loluju,

iphunga lezambatho zakho linjengephunga laseLebanoni.

12Udadewethu lomlobokazi wami uyisivande esikhiyiweyo,

impela uyisivande esikhiyiweyo, lomthombo obiyelweyo.

13Amahlumela akho ayizihlahla zamapomegranati,

lezihlahla ezilezithelo ezinhle,

14 ezenadi lesafroni lekalamu lekinamoni,

lezihlahla zonke zempepha, imure lenhlaba,

lamakha wonke amahle kakhulu.

15Ungumthombo omuhle kulayo yonke esivandeni,

ungumthombo ogobhozayo olamanzi

ehlayo evela entabeni yaseLebanoni.

Umlobokazi:

16Vuka, wena moya wasenyakatho,

uze lawe, moya waseningizimu,

uphephethe esivandeni sami

ukuba iphunga laso ligcwale emoyeni.

Kasize isithandwa sami esivandeni sami,

sidle izithelo zaso ezinhle.