Hez 32 - Ndebele Bible (iBhayibhili Elingcwele) 1978

UFaro ufanana lengwenya

1Ngomnyaka wetshumi lambili, ngosuku lokuqala enyangeni yetshumi lambili, ilizwi leNkosi lafika kimi lathi:

2Ndoda, khala isililo ngoFaro inkosi yaseGibithe, uthi kuye:

Wena uzifanise lesilwane phakathi kwezizwe,

kodwa wena ufana lengwenya emanzini omfula iNile;

uvuthela amanzi ngamakhala akho,

uvube amanzi ngenyawo zakho,

ungcolise imifula.

3INkosi uNkulunkulu ithi:

Ngizaphosela imbule lami phezu kwakho

ekubuthaneni kwezizwe ezinengi,

ngikukhuphe ngembule lami,

4ngikuphosele emhlabathini,

ngikuphose endaweni eligceke,

ngihlalise phezu kwakho zonke inyoni zaphezulu,

zonke izilo zeganga zizitike ngawe.

5Ngizalahla inyama yakho ezintabeni,

ngigcwalise izihotsha ngempethu zesidumbu sakho.

6Ilizwe lizagcwala igazi lakho eligelezayo,

lize lifike ezintabeni,

lezifudlana zonke zigcwale lona.

7Lapho sengikuchitha, ngizasibekela iphezulu,

ngenze inkanyezi zalo zibe mnyama,

ngisibekele ilanga ngeyezi,

lenyanga ingabe isakhanya.

8Konke ukukhanya kwaphezulu ngikwenze kube mnyama kuwe,

ngehlisele umnyama elizweni lakho,

kutsho iNkosi uNkulunkulu.

9Ngizakhathaza inhliziyo zabantu abanengi nxa ngikuthumba phakathi kwezizwe, ngikusa emazweni ongawaziyo.

10Ngizakwenza abantu abanengi bamangale ngawe, lamakhosi abo athuthumele ngenxa yakho nxa ngigweba umkhonto wami phambi kwabo; bazathuthumela isikhathi sonke, bonke babe lovalo ngokuphila kwabo mhla wosuku lokuwa kwakho.

11Ngoba iNkosi uNkulunkulu ithi: Umkhonto wenkosi yaseBabiloni uzakukwehlela.

12Ngizabulala ixuku lakho ngemikhonto yamaqhawe asabeka kuzo zonke izizwe. Azakuqeda ukuziphakamisa kweGibithe, kubhubhe lalo lonke ixuku lalo.

13Ngizabulala inyamazana zonke emanzini amanengi, kungabi khona lonyawo lomuntu oluwadungayo futhi, kungabi khona lesondo lenyamazana eliwavubayo.

14Besengisenza amanzi alo azike, lemifula yalo igeleze njengamafutha, kutsho iNkosi uNkulunkulu.

15Lapho ngichitha ilizwe laseGibithe, lalapho ilizwe liphundlwa konke okukilo, lalapho ngitshaya bonke abahlala kilo, bazakwazike ukuba ngiyiNkosi.

16Lokhu kuyisililo esizahlatshelwa; abesifazana bezizwe bazakusihlabela; bazakusihlabela ngeGibithe langalo lonke ixuku lalo, kutsho iNkosi uNkulunkulu.

17Ngomnyaka wetshumi lambili, ngosuku lwetshumi lanhlanu lwenyanga yokuqala, ilizwi leNkosi lafika kimi lathi:

18Ndoda, khalela abantu bonke baseGibithe, ubehlisele elizweni elingaphansi komhlaba kulabo abehlela egodini, bona labesifazana bezizwe ezilodumo.

19Uthi kibo: Ledlula bani ngobuhle na? Yehlani, lilaliswe labangasokanga.

20Labo abahamba labo, kanye labo bonke abantu babo, bazakufa kanye lalabo ababulawa ngomkhonto.

21Izikhulu ezilamandla zizakhuluma ngabo labasizi babo, zisendaweni zabafileyo zithi: Sebehlile, balele abangasokanga bebulewe empini.

22IAsiriya likhona lapho kanye lexuku lalo lonke, lamaliba alo elihanqile inxa zonke, bonke babulawe empini.

23Amaliba abo enziwe ekutshoneni kwegodi, lexuku lalo lihanqe iliba lalo, bonke bebulewe empini, bona ababesesatshwa elizweni labaphilayo.

24Likhona lapho iElamu lexuku lalo lonke lihanqe iliba lalo, bonke bebulewe empini, behlela elizweni elingaphansi komhlaba bengasokanga, bona ababesesatshwa elizweni labaphilayo, bathwele ihlazo labo kanye labo abehlela egodini.

25Balenzela indawo yokulala phakathi kwabafileyo kanye lexuku lalo lonke, amaliba abo elihanqile, bonke bengasokanga, bebulewe empini. Ukwesabeka kwabo kwakugcwele elizweni labaphilayo, bathwala ihlazo labo kanye labo abehlela egodini, babekwa phakathi kwabafileyo.

26IMesheki leTubali zikhona lapho kanye lamaxuku azo wonke, lamaliba awo ezihanqile, bonke bengasokanga, bebulewe empini, ngoba babesesatshwa elizweni labaphilayo.

27Kabayikulala lamaqhawe afa kudala ehlela endaweni yabafileyo lezikhali zawo, aqanyeliswa imikhonto yawo, lamathambo awo endlalelwa ngezihlangu zawo; ukwesabeka kwamaqhawe kwakuselizweni labaphilayo.

28Lawe Faro uzabulawa, ulaliswe phakathi kwabangasokanga, labo ababuleweyo empini.

29IEdoma likhona lapho, kanye lamakhosi lezikhulu zalo, loba babelamandla balaliswe kanye lalabo ababuleweyo empini, belele labangasokanga labehlela phansi egodini.

30Izikhulu zasenyakatho zikhona lapho, zonke ngoluthi lwazo, labo bonke abaseSidoni, abehlele phansi kanye labafileyo belenhloni ngenxa yokwesabeka konke abakwenza ngamandla abo; balele bangasokanga kanye labo ababuleweyo empini, bethwele ihlazo labo lalabo abehlela egodini.

31Lapho uFaro ebabona, uzaziduduza ngenxa yamaxuku akhe wonke, uFaro lempi yakhe yonke, bebulewe empini, kutsho iNkosi uNkulunkulu.

32Ngoba yena owagcwalisa ukwesabeka kwakhe elizweni labaphilayo uzabekwa phakathi kwabangasokanga kanye lalabo ababuleweyo empini, uFaro lexuku lakhe lonke, kutsho iNkosi uNkulunkulu.