1 Lan 23 - Ndebele Bible (iBhayibhili Elingcwele) 1978

1Kwathi uDavida esemdala eseluphele wamisa uSolomoni indodana yakhe ukuba abe yinkosi koIsrayeli.Izigaba zabapristi lezamaLevi lemisebenzi yazo

2UDavida wasebuthanisa zonke izinduna zakoIsrayeli labapristi lamaLevi.

3Kwabalwa amaLevi ayeleminyaka engamatshumi amathathu kusiya phezulu, aba zinkulungwane ezingamatshumi amathathu lesificaminwembili.

4UDavida wakhetha ayizinkulungwane ezingamatshumi amabili lane ukuphatha umsebenzi weNkosi uNkulunkulu; ayizinkulungwane eziyisithupha ukuba yizinduna labahluleli;

5ayizinkulungwane ezine ukuba ngabagcini bamasango; ayizinkulungwane ezine ukudumisa iNkosi ngezinto zokuhlabelela ayezenzele ukudumisa.

6UDavida wawahlukanisa izigaba ezibizwa ngamabizo aboGerishoni loKohathi loMerari, amadodana kaLevi.

7Amadodana kaGerishoni ayengoLadani loShimeyi.

8Amadodana kaLadani ayemathathu engoJehiyeli, omkhulu wabo, loZethamu loJoweli.

9Amadodana kaShimeyi ayengoShelomothi loHaziyeli loHarani, emathathu. La ayezinhloko zezindlu zakoLadani.

10Amadodana kaShimeyi ayengoJahathi loZiza loJewushi loBeriya, emane.

11UJahathi wayengomkhulu elandelwa nguZiza; uJewushi loBeriya babengelabantwana abanengi, babalwa njengandlunye.

12Amadodana kaKohathi ayengoAmramu loIzihari loHebroni loUziyeli, emane.

13Amadodana kaAmramu ayengoAroni loMose. UAroni wehlukaniselwa ukunikela izinto ezingcwele kakhulu kuNkulunkulu, ukuba yena lamadodana akhe batshise impepha phambi kweNkosi lokuyikhonza lokubusisa ngebizo layo kuze kube nininini.Eks 28:1

14Kodwa amadodana kaMose umuntu kaNkulunkulu abalelwa esizweni sakoLevi.

15Amadodana kaMose ayengoGereshoma loEliyezeri.

16Emadodaneni kaGereshoma uShebuweli wayengomkhulu.

17Emadodaneni kaEliyezeri uRehabiya wayengomkhulu; uEliyezeri wayengelawo amanye amadodana, kodwa amadodana kaRehabiya ayemanengi kakhulu.

18Emadodaneni kaIzihari uShelomothi wayengomkhulu.

19Amadodana kaHebroni ayengoJeriya omkhulu, elandelwa nguAmariya, kulandele uJahaziyeli, kulandele uJekameyamu.

20Amadodana kaUziyeli ayengoMika omkhulu, elandelwa nguIshiya.

21Amadodana kaMerari ayengoMahli loMushi. Amadodana kaMahli ayengoEleyazare loKishi.

22UElayazare wafa engelamadodana, kodwa elamadodakazi kuphela endela emadodaneni kaKishi, izihlobo zawo.

23Amadodana kaMushi ayengoMahli loEderi loJeremothi, emathathu.

24Lawo ngamadodana kaLevi ngezindlu zawo, inhloko zezindlu, lalabo abaqanjwe ngamunye ngamabizo; ababeleminyaka engamatshumi amabili kusiya phezulu baphatha umsebenzi wenkonzo yethempeli.

25Ngoba uDavida wathi: INkosi, uNkulunkulu kaIsrayeli, ibanikile abantu bayo ukuthula, izakuhlala eJerusalema kokuphela.

26Kakusadingeki ukuba amaLevi athwale iTabernakeli lezinye izinto zenkonzo yalo.Dute 10:8

27Ngoba njengokutsho kukaDavida kokucina amaLevi abhalwa kusukela kwaleminyaka engamatshumi amabili kusiya phezulu.

28Umsebenzi wawo wawuyikusiza amadodana kaAroni enkonzweni yethempeli, ukugcina amaguma lezindlu, lokuhlambulula zonke izinto ezingcwele, lokwenza eminye imisebenzi yethempeli,Nani 3:5–9

29lokulungisa izinkwa ezahlukaniselwa uNkulunkulu lempuphu yomnikelo wempuphu, lezinkwa ezingelamvubelo, lezinkwa zokosiwa, lenhlama, lezilinganiso zonke.

30Azakuba khona insuku zonke ekuseni abonge adumise iNkosi, enze njalo lantambama,

31langazo zonke izikhathi zokunikelwa komnikelo wokutshiswa eNkosini ngamaSabatha, langezikhathi zokuthwasa kwenyanga, langensuku zemikhosi, njengokumiswa kwenani lawo. Azakuwenzela iNkosi lumsebenzi kokuphela.

32Azakugcina ithente lokuhlangana, lendlu engcwele, asize amadodana kaAroni izihlobo zawo, enkonzweni yethempeli.