1 Sam 25 - Ndebele Bible (iBhayibhili Elingcwele) 1978

UDavida loAbigayili

1USamuweli wafa; bahlangana bonke abakoIsrayeli ukumlilela, bamngcwabela emzini wakhe eRama. UDavida wasuka waya enkangala yaseParani.

2Kwakukhona indoda eKarmeli eliseMahoni eyayilemfuyo enengi. Yayinothile kakhulu; yayilezimvu eziyizinkulungwane ezintathu lembuzi eziyizinkulungwane. Yayigunda izimvu zayo eKarmeli.

3Ibizo laleyondoda lalinguNabali, lebizo lomkayo linguAbigayili. Owesifazana wayehlakaniphile, emuhle, kodwa indoda yakhe yayilukhuni elezenzo ezimbi; yayingeyakoKalebi.

4UDavida wezwa esenkangala ukuba uNabali ugunda izimvu zakhe.

5UDavida wasethuma insizwa ezilitshumi, wathi kuzo: Hambani eKarmeli, liye kuNabali, limbingelele ebizweni lami,

6lithi: Ukuthula kakube kuwe, lasendlini yakho, lakukho konke olakho.

7Ngizwile kuthiwa uyagunda izimvu zakho. Abelusi bakho bebelathi; kasibalimazanga, futhi kabalahlekelwanga lutho zonke insuku beseKarmeli.

8Buza insizwa zakho, zizakukutshela. Yamukela ngomusa insizwa zami, ngoba sifike ngosuku lomkhosi. Akunike inceku zakho lendodana yakho uDavida lokho olakho.

9Sezifikile insizwa zikaDavida, zakhuluma kuNabali konke lokho ebizweni likaDavida; zasezilinda.

10UNabali waziphendula inceku zikaDavida, wathi: Ngubani uDavida na? Ngubani lindodana kaJese na? Lamuhla zinengi inceku ezibalekayo emakhosini azo.

11Ngithathe ukudla kwami, lamanzi ami, lenyama engiyihlabele abagundi bami, ngikuphe abantu engingabazi ukuthi bavela ngaphi na?

12Zaseziphenduka inceku zikaDavida, zabuyela kuye, zambikela konke.

13UDavida wasesithi ebantwini bakhe: Wonke umuntu kahlome ngomkhonto wakhe! UDavida laye wahloma ngomkhonto wakhe; bamlandela uDavida abantu abangamakhulu amane, kodwa abangamakhulu amabili basala empahleni.

14Enye insizwa yamtshela uAbigayili umkaNabali yathi: UDavida wathuma izithunywa zivela enkangala ukubingelela inkosi yethu, kodwa yazithethisa.

15Kanti labobantu basiphatha kuhle kakhulu, kasilimalanga, kasilahlekelwanga lutho lapho sasilabo emmangweni.

16Babengumduli osivikelayo ebusuku lemini, sonke isikhathi silabo saluse izimvu.

17Cabanga kuhle ngokufanele ukwenze; ngoba inkosi yethu kanye lendlu yayo yonke izachitheka impela; lokhu ingumuntu omubi kangaka, umuntu okungeke kukhulunywe laye.

18UAbigayili wasephangisa ethatha izinkwa ezingamakhulu amabili, lembodlela ezimbili zewayini, lezimvu ezinhlanu ezihlatshiweyo, lamagokoko amane omumbu okhanzingiweyo, lamahlukuzo alikhulu ezithelo zevini ezomisiweyo, lezinkwa ezingamakhulu amabili zomkhiwa, wakuthwalisa obabhemi.

19Wathi ezinsizweni: Hambani phambili; ngiyalilandela. Kodwa kamtshelanga umkakhe uNabali.

20Kwathi esagade ubabhemi esehlela endaweni esithekileyo yentaba, kwathutshela kuye uDavida labantu bakhe; wahlangana labo.

21UDavida wayethe: Impela ngachitha isikhathi ngokugcina impahla yalumuntu enkangala, kakwaze kwalahleka lutho. Usengibuyisele okuhle ngokubi.

22UNkulunkulu enze njalo kimi ngokwengezelelweyo, uba kusasa ngitshiya loyedwa owesilisa kwabangabakhe.

23Lapho uAbigayili ebona uDavida, waphangisa ukwehla kubabhemi wakhe, wathi mbo ngobuso phansi phambi kukaDavida.

24Wawela ngasenyaweni zakhe wathi: Lobobubi kabube phezu kwami ngedwa, nkosi yami; akuvumele incekukazi yakho ikhulume lawe, uzwe amazwi encekukazi yakho.

25Inkosi yami kayingamnanzi lowomuntu omubi uNabali; ngoba unjengebizo lakhe yena; ibizo lakhe litsho ukuthi: Isithutha; impela ubuthutha bukuye. Kodwa mina, ncekukazi yakho, kangizibonanga insizwa zenkosi yami eyayizithumile.

26Ngakhoke, nkosi yami, ngifunga inkosi, ngifunge lawe, njengoba iNkosi uNkulunkulu ikuthintile ukungena ecaleni lokuchitha igazi, lokuphindisela ngesandla sakho, ngalokhoke kazibe njengoNabali izitha zakho lalabo abafuna ukuyenza okubi inkosi yami.

27Lesisipho esilethwa yincekukazi yakho enkosini yami kasinikwe insizwa ezilandela inkosi yami.

28Akuthethelele icala lencekukazi yakho; ngoba iNkosi uNkulunkulu izamisa inzalo yakho kokuphela, lokhu ulwa izimpi zeNkosi. Kawuyikwehlelwa yibubi zonke insuku zokuphila kwakho.

29Loba kusuka umuntu exotshana lawe efuna ukuphila kwakho, iNkosi uNkulunkulu wakho izagoqela ukuphila kwakho, ikugcine; kodwa ukuphila kwezitha zakho izakukujikijela kungathi kuphoswa amatshe ngesavutha.

30Lapho iNkosi uNkulunkulu isikwenzile enkosini yami konke okuhle ekukhulume ngawe, isikubekile waba ngumbusi koIsrayeli,

31kakungabi khona lokho okubanga usizi lokuhlupha isazela senkosi yami, ngokuthi ichithe igazi ngeze, lokuthi iphindisele. Lapho iNkosi uNkulunkulu isiyenzele okuhle inkosi yami, khumbula incekukazi yakho.

32UDavida wasesithi kuAbigayili: Kayibusiswe iNkosi, uNkulunkulu kaIsrayeli, ekuthumileyo lamuhla ukungihlangabeza.

33Futhi akubusiswe ukuhlakanipha kwakho, ubusiswe lawe ongithintileyo lamuhla ukuba ngingangeni ecaleni lokuchitha igazi lokuphindisela ngesandla sami.

34Ngoba ngifunga iNkosi, uNkulunkulu kaIsrayeli, engithintileyo ukuba ngingakulimazi, uba ungahlanga wangihlangabeza, bekungayikusala kuNabali kusasa loyedwa owesilisa.

35UDavida wasesamukela kuye lokho amlethele khona. Wathi kuye: Hamba kuhle endlini yakho; ngililalele ilizwi lakho, ngasivuma lesicelo sakho.

36UAbigayili wabuyela kuNabali, wamfica eledili endlini yakhe, idili elinjengelenkosi. UNabali wayethokoza ngoba wayenathe kakhulu; ngakho uAbigayili kamtshelanga lutho kwaze kwasa.

37Kwathi ekuseni lapho iwayini seliphelile kuye, umkakhe wasemtshela lezizinto, uNabali waqaleka, walala waba njengelitshe.

38Kwathi emva kwensuku ezilitshumi iNkosi yamtshaya uNabali, wafa.

39UDavida esezwile ukuthi uNabali kasekho wathi: Kayibongwe iNkosi ephindisele ukuthukwa kwami nguNabali, yathinta inceku yayo ekwenzeni okubi, yabuyisela ububi bukaNabali kwelakhe ikhanda. UDavida wasethumela ilizwi, wakhuluma loAbigayili ukuba amthathe abe ngumkakhe.

40Lapho inceku zikaDavida zifika kuAbigayili eKarmeli, zathi kuye: UDavida usithumile kuwe ukuba sikuthathe sikuse kuye ube ngumkakhe.

41Yena wathi mbo ngobuso bakhe phansi, wathi: Incekukazi yakho kayibe yisigqili sokugezisa inyawo zezinceku zenkosi yami.

42UAbigayili wasephangisa esuka, wagada ubabhemi; wahamba kanye lentombi ezinhlanu ezazimphelekezela, walandela inceku zikaDavida, waba ngumkakhe.

43UDavida wathatha loAhinowama waseJezereli, bobabili baba ngomkakhe.

44USawuli wayesenike uPaliti indodana kaLayishi waseGalimi umkaDavida, uMikhali indodakazi yakhe.