uEzra 5 - Ndebele Bible (iBhayibhili Elingcwele) 1978

Ukuqhubeka komsebenzi wokwakha ithempeli

1Abaprofethi oHagayi loZekariya indodana kaIdo batshumayela bekhuthaza abaJuda ababekoJuda laseJerusalema ebizweni likaNkulunkulu kaIsrayeli.Hag 1:1; Zek 1:1

2Kwasekusuka oZerubabeli indodana kaSalatiyeli loJeshuwa indodana kaJozadaki, bayakha indlu kaNkulunkulu eseJerusalema, labaprofethi bakaNkulunkulu babasiza.Hag 1:12; Zek 4:6–9

3Basebefika oTathenayi umbusi welizwe elingaphetsheya kweYufrathi loShethari‐Bozenayi, labanye bakibo, bathi: Ngubani okhuphe umthetho olivumele ukwakha lindlu lokuyiqedisa na?

4Basebebabuza lokuthi: Ngobani amabizo abantu abakha lindlu na?

5Kodwa uNkulunkulu wabo wabalondoloza abadala babaJuda, kababamisanga kuze leyondaba ifinyelele kuDariyu, abuyise impendulo ngencwadi ngayo.

6Nansike incwadi abayithumela kuDariyu inkosi oTathenayi umbusi welizwe elingaphetsheya kweYufrathi loShethari‐Bozenayi lababelabo ababusi ababeselizweni elingaphetsheya kweYufrathi,

7baloba bathi:

Nkosi Dariyu, siyakubingelela.

8Siyayazisa inkosi ukuthi besiselizweni lakoJuda, endlini kaNkulunkulu omkhulu. Safumanisa ukuthi iyakhiwa ngamatshe amakhulu, lokuthi sekufakwe izigodo emidulini; umsebenzi uyaqhubeka kuhle, uya phambili ngokusebenza kwabo.

9Sasesibabuza abadala sathi: Ngubani okhuphe umthetho olivumele ukwakha lindlu lokuyiqedisa na?

10Sababuza amabizo abo ukuze sikubikele, lokuze silobe amabizo abantu ababaphetheyo.

11Bona basiphendula bathi: Thina siyizinceku zikaNkulunkulu wezulu lomhlaba, sivusa indlu eyayakhiwe eminyakeni eminengi eyedlulileyo, inkosi enkulu yakoIsrayeli eyayakha yayiqeda.

12Kodwa ngoba okhokho bethu bamthukuthelisa uNkulunkulu ophezulu, wabanikela esandleni sikaNebukadineza inkosi yaseBabiloni, umKaladiya, owadiliza lindlu, wathumba labantu wabasa eBabiloni.2 Kho 25:8–12; 2 Lan 36:17–20; Jer 52:12–15

13Kodwake uKurosi inkosi yaseBabiloni ngomnyaka wokuqala wokubusa kwakhe wakhupha umthetho wokuthi lindlu kaNkulunkulu kayakhiwe futhi.Ezra 1:2–11

14Lezitsha zegolide lezesiliva ezendlu kaNkulunkulu uNebukadineza ayezithethe ethempelini eJerusalema wazifaka ethempelini laseBabiloni, uKurosi inkosi wazikhupha ethempelini eBabiloni, wazinikeza kuSheshibazari ayembeke ukuba abe ngumbusi,

15wathi kuye: Thatha lezizitsha, uyezibeka ethempelini eliseJerusalema, lendlu kaNkulunkulu yakhiwe futhi endaweni yayo.

16USheshibazari lowo wafika wabeka izisekelo zendlu kaNkulunkulu eseJerusalema; kusukela kulesosikhathi kuze kube khathesi ilokhu isakhiwa, kayikapheli.

17Ngakhoke uba kulungile enkosini kakuhlolisiswe endlini yokugcina impahla zenkosi eBabiloni ukuba kubonwe ukuthi umthetho wakhutshwa yini nguKurosi inkosi ukuba kwakhiwe futhi lindlu kaNkulunkulu eJerusalema. Inkosi isitshele ekufisayo ngalindaba.