Jobe 4 - Ndebele Bible (iBhayibhili Elingcwele) 1978

Inkulumo yokuqala kaElifazi: uthi uNkulunkulu ulungile

1Wasephendula uElifazi waseTemani wathi:

2Uba kukhulunywa lawe, uzathukuthela na?

Kodwa ngubani ongathula angakhulumi na?

3Khangela, uqondisile abanengi,

waqinisa izandla zababuthakathaka.

4Amazwi akho amsekela okhubekayo,

waqinisa amadolo axegayo.

5Kodwa khathesi sekufikile kuwe, uyakhathazeka;

kuyakuthinta wena, utshaywa luvalo.

6Ukumesaba kwakho uNkulunkulu kakusilo ithemba lakho yini,

lobuqotho bendlela yakho kabusiso isisekelo sakho na?

7Akucabange, ngubani owake wachithwa engelacala na?

Olungileyo wake wabhujiswa ngaphi na?

8Njengengikubonileyo, abalima ububi behlanyela inkathazo,

bavuna khona lokho.

9Babhujiswe ngokuphephetha kukaNkulunkulu,

langokuthukuthela kwakhe bayaphela.

10Ukubhonga kwesilwane lelizwi lesilwane esesabekayo kuthule,

amazinyo emidlwane yesilwane aphukile.

11Isilwane esilamandla siyabhubha ngokuswela ukudla,

lemidlwane yesilwane ichitheke.

12Nganyenyezelwa yilizwi,

lendlebe yami yezwa ukunyenyeza kwalo.

13Emicabangweni evela emibonweni yasebusuku,

lapho abantu sebehlelwe yibuthongo obukhulu,

14ngafikelwa yikwesaba lokuthuthumela okwenza wonke amathambo ami aqhaqhazela.

15Kwedlula umoya ebusweni bami,

loboya bomzimba wami bavuka.

16Kwema othile, wathula,

kodwa angisiqondanga isimo sakhe;

isimo sasiphambi kwami,

kwathula, ngasengisizwa ilizwi lisithi:

17Kambe umuntu angalunga phambi kukaNkulunkulu na?

Umuntu angahlambuluka phambi koMenzi wakhe na?

18UNkulunkulu kazithembi inceku zakhe,

lezithunywa zakhe uzibeka icala;

19kuzakuba njani, pho, kulabo abahlala ezindlini zebumba,

abalezisekelo ezisothulini,

abachotshozwa njengenondo.

20Bayabhujiswa ngosuku lunye nje,

bachithwe kuze kube nininini bengananzwa muntu.

21Uba intambo yokuphila kwabo iqanyulwa,

bafa bengakafumani ukwazi.