uAmosi 9 - Ndebele Bible (iBhayibhili Elingcwele) 1978

Ukwahlulela kweNkosi

1Ngayibona iNkosi imi phansi kwealtare, yathi:

Tshaya izihloko zezinsika ukuze iminyango inyikinyeke,

uzaphulele amakhanda abo bonke abantu;

abaseleyo ngizababulala ngempi;

kakuyikuphunyuka loyedwa abaleke.

2Loba besehlela endaweni yabafileyo, isandla sami sizabakhupha khona;

loba bakhwela besiya ezulwini, ngizabehlisa khona;

3loba becatsha engqongeni yeKarmeli, ngizabadinga ngibehlise lalapho;

loba becatsha enzikini yolwandle, ngizathumela umgobho ukuba ubalume;

4loba bethunjwa yizitha zabo, lalapho ngizathumela impi ukuba ibabulale;

ngizabehlisela okubi ngingabehliseli okuhle.

5INkosi uNkulunkulu wamabandla yiyo ethinta umhlaba unyikinyeke,

bakhale bonke abakhileyo kuwo,

ukhukhumale wonke njengomfula iNile, ubuye ubohle njengeNile laseGibithe.

6Yiyo eyakha izindlu zayo emazulwini,

yamisa umkhathi wayo phezu komhlaba,

ebiza amanzi olwandle, iwanisele phezu komhlaba;

yiNkosi ibizo layo.

7Kimi kalinjengamaEtiyopiya, lina bakoIsrayeli na? itsho iNkosi.

Mina engakhupha uIsrayeli elizweni laseGibithe

kangikhuphulanga amaFilistiya eKafitori lamaSiriya eKiri na?

8Khangelani, mina Nkosi uNkulunkulu

ngiwuqaphele umbuso owonayo;

ngizawuchitha emhlabeni,

kodwa kangiyikuyichitha yonke indlu kaJakobe,

kutsho iNkosi.

9Ngoba ngizakulaya ukuba uIsrayeli ahlungulwe phakathi kwazo zonke izizwe

njengokuhlungulwa kwamabele ngokhomane,

kodwa kakuyikuwela phansi lolulodwa uhlamvu.

10Zonke izoni ebantwini bami zizabulawa empini,

zona ezithi: Okubi kakuyikufinyelela kithi.

UIsrayeli uzakubuyiswa

11Ngalolosuku ngizakuvusa idumba likaDavida eliwileyo,

ngivale izikhala zalo, ngilungise okudilikileyo kwalo,

ngilakhe kutsha njengasensukwini zasendulo;

12ukuze badle ilifa lokuseleyo eEdoma,

lasezizweni zonke ezibizwa ngebizo lami,

kutsho iNkosi eyenza lokhu.

13Khangelani, insuku ziyeza, kutsho iNkosi,

lapho olimayo ezakuficana lovunayo,

lokhama izithelo zevini aficane lohlanyela inhlanyelo;

intaba zizathonta iwayini elimnandi,

amaqaqa wonke ageleze iwayini.

14Ngizabuyisa abantu bami uIsrayeli,

bayakhe futhi imizi echithekileyo, bahlale kiyo;

bahlanyele izivini, banathe iwayini lazo,

balime amasimu, badle izithelo zawo.

15Ngizakubagxumeka elizweni labo,

bangabe besasitshulwa futhi elizweni engibanike lona,

kutsho iNkosi uNkulunkulu wakho.