uMika 3 - Ndebele Bible (iBhayibhili Elingcwele) 1978

Ukusolwa kwabakhokheli ababi

1Ngathi: Zwanini, lina zinhloko zakoJakobe,

lani zikhulu zakoIsrayeli.

Kakusikho okwenu yini ukwazi ukulunga na?

2lina elizonda okuhle, lithande okubi,

elebula isikhumba sabantu bami,

lihlubule inyama emathanjeni abo,

3elibadla inyama abantu bami,

lihlinze isikhumba sabo,

lephule amathambo abo,

libaqobe njengenyama esembizeni lanjengenyama esebhodweni.

4Lizakhuleka eNkosini, kodwa kayiyikuliphendula;

izakulifihlela ubuso bayo ngalesosikhathi,

ngoba lenzile okubi.

5INkosi ithi ngabaprofethi abaduhisa abantu bami,

ababathembisa ukuthula lapho besazuza ukudla,

kodwa lowo ongabaniki ukudla balwe laye:

6Ngakho lizafikelwa yibusuku obungelambono,

kube mnyama, lingabe lisavumisa;

ilanga lizabatshonela abaprofethi,

losuku lube mnyama tshu.

7Ababoni bazayangeka, lezanuse zibe lenhloni,

bambomboze imilomo yabo, ngoba kungaveli impendulo kuNkulunkulu.

8Kodwa mina nginikwe amandla,

lokulunga lesibindi, ukuba ngimtshele uJakobe iziphambeko zakhe

loIsrayeli isono sakhe.

9Zwanini lokhu, lina zinhloko zendlu kaJakobe,

lani zikhulu zendlu kaIsrayeli,

elinengwa yikulunga, lihlanekele bonke ubuqotho,

10elakha iZiyone ngegazi, leJerusalema ngobubi.

11Inhloko zalo zahlulelela imali,

abapristi balo bafundisela inkokhelo,

abaprofethi balo bavumisela imali;

kanti bathembela eNkosini besithi:

INkosi kayikho phakathi kwethu na?

Ngakhoke kasiyikwehlelwa ngokubi.

12Ngakhoke ngenxa yenu iZiyone lizalinywa njengensimu,

leJerusalema libe lunxiwa oludilikileyo,

lentaba yethempeli iphenduke ibe lihlathi.