Jer 42 - Ndebele Bible (iBhayibhili Elingcwele) 1978

Ilizwi likaJeremiya kuJohanani

1Zasezisondela zonke induna zempi, loJohanani indodana kaKareya, loAzariya indodana kaHoshaya, labo bonke abantu abancinyane labakhulu,

2bathi kuJeremiya umprofethi: Ake uzwe ukunxusa kwethu, usikhulekele eNkosini uNkulunkulu wakho, ukhulekele bonke laba abaseleyo, ngoba sisele siyingcosana nje kwabanengi, njengalokho lawe ubona,

3ukuba iNkosi, uNkulunkulu wakho, isitshengise indlela esifanele ukuhamba ngayo, lalokho esifanele ukukwenza.

4UJeremiya umprofethi wathi kibo: Sengilizwile; ngizakhuleka eNkosini uNkulunkulu wenu njengokucela kwenu, lalokho iNkosi ekutshoyo ngizalitshela khona, kangiyikuthula.

5Basebesithi kuJeremiya: INkosi kayibe ngufakazi oqinisileyo lothembekileyo ngathi, uba singenzi njengelizwi leNkosi, uNkulunkulu wakho, elithuma kithi ngawe.

6Loba kukuhle loba kukubi, sizalalela ilizwi leNkosi, uNkulunkulu wethu, esikuthuma kuyo, ukuze kusilungele lapho sililalela ilizwi leNkosi, uNkulunkulu wethu.

7Kwathi ngemva kwensuku ezilitshumi, ilizwi leNkosi lafika kuJeremiya.

8Wasebiza uJohanani indodana kaKareya, lazo zonke induna zempi ezazilaye, labantu bonke abancinyane labakhulu;

9wathi kibo: INkosi, uNkulunkulu kaIsrayeli, elingithume kiyo ukuba ngilinxusele, ithi:

10Uba lihlala kulelilizwe, ngizakulakha ngingalidilizi, ngiligxumeke, ngingalisiphuni; ngoba ngiyazisola ngokubi engikwenzileyo kini.

11Lingayesabi inkosi yaseBabiloni eliyesabayo, kutsho iNkosi; ngoba mina ngilani ukuba ngilisize ngilophule esandleni sayo.

12Ngizaliphatha ngomusa, ukuze ibe lomusa kini, iliyekele ukuba lihlale elizweni lakini.

13Kodwa uba lisithi: Kasiyikuhlala kulelilizwe; lingalilaleli ilizwi leNkosi uNkulunkulu wenu,

14lithi: Atshi bo! sizakuya elizweni laseGibithe lapho singayikubona impi khona, singayikuzwa ukukhala kophondo, singayikulamba, sihlale khona;

15zwaninike ilizwi leNkosi, lina eliseleyo koJuda. INkosi yamabandla, uNkulunkulu kaIsrayeli, ithi: Uba lifisa ukuya eGibithe ukuba lihlale khona,

16impi eliyesabayo izalifica khona elizweni laseGibithe, lendlala eliyesabayo izalilandela eGibithe, lifele khona.

17Bonke abantu abafisa ukuya eGibithe ukuba bahlale khona bazabulawa yimpi layindlala langumkhuhlane, kungasali muntu aphunyuke kokubi engizabehlisela khona.

18INkosi yamabandla, uNkulunkulu kaIsrayeli, ithi: Njengokuba ukuthukuthela kwami lolaka lwami kwehlela kwabakhileyo eJerusalema, ngokunjalo ulaka lwami luzakwehlela kini nxa lisiya eGibithe. Lizakuba yinto eyenyanyekayo leyesabekayo, into yokuthukwa lokuhlekwa, lingaphindi liyibone lindawo futhi.

19INkosi ithe kini, lina abaseleyo koJuda: Lingayi eGibithe. Yazini impela ukuba ngilixwayisile lamuhla.

20Lizifake engozini ngokungithuma eNkosini, uNkulunkulu wenu, lisithi: Sikhulekele eNkosini uNkulunkulu wethu; lokho iNkosi uNkulunkulu wethu ekutshoyo, sizakukwenza.

21Sengilitshelile lamhla, kodwa kalililalelanga ilizwi leNkosi uNkulunkulu wenu kukho konke engitshele khona ukuba ngilitshele.

22Yazini impela ukuba lizakubulawa yimpi layindlala langumkhuhlane endaweni elifisa ukuyahlala kiyo.