uAmosi 2 - Ndebele Bible (iBhayibhili Elingcwele) 1978

1INkosi ithi:

Ngenxa yeziphambeko ezinengi zamaMowabi kangiyikuwayekela,

ngoba atshisa amathambo enkosi yaseEdoma aze aba ngumlotha.

2Ngakho ngizathumela umlilo kuMowabi

ozakuqeda izinqaba zaseKeriyothi,

uMowabi afele phakathi kokuxokozela lokumemeza lokukhala kophondo;

3ngizakuqeda umbusi wakhe,

ngibulale zonke izikhulu kanye laye; kutsho iNkosi.

4INkosi ithi:

Ngenxa yeziphambeko ezinengi zakoJuda kangiyikubayekela,

ngoba bawalile umlayo weNkosi,

kabagcinanga izimiso zayo,

baduhiswe yizithombe zabo abazikhonzayo lokhokho babo.

5Ngakho ngizathumela umlilo koJuda

ozakuqeda izinqaba zeJerusalema.

Ukwahlulelwa kukaIsrayeli

6INkosi ithi:

Ngenxa yeziphambeko ezinengi zakoIsrayeli kangiyikubayekela,

ngoba bathengisa abalungileyo ngesiliva

labaswelayo ngamanyathelo;

7banyathezela phansi abayanga,

baphambanise abathobileyo endleleni yabo.

Umuntu loyise baya entombininye,

bangcolise ibizo lami elingcwele.

8Bacambalala emaceleni awo wonke ama‐altare

engutsheni ezinikwe zaba yisibambiso,

banathe endlini kaNkulunkulu wabo iwayini labahlawulisiweyo.

9Kanti mina ngachitha amaAmori phambi kwabo,

ubude bawo babulingana lobude bezihlahla zomkusu ezinde,

lokuqina kwawo kunjengezihlahla ezinkulu;

kodwa ngachitha izithelo zawo ngaphezulu,

lempande zawo ngaphansi.

10Futhi mina ngalikhupha elizweni laseGibithe,

ngalihola enkangala iminyaka engamatshumi amane,

ukuba lithumbe ilizwe lamaAmori.

11Ngavusa abanye emadodaneni enu ukuba babe ngabaprofethi,

labanye ensizweni zenu ukuba babe ngamaNaziri.

Kakunjalo yini lina bantu bakoIsrayeli na? kutsho iNkosi.

12Kodwa lawanathisa iwayini amaNaziri,

labatshela abaprofethi ukuba bangatshumayeli.

13Khangelani, ngizalinyathela endaweni yenu

njengenqola egcwele izithungo inyathela umuntu.

14Olejubane uzaphelelwa yisiqubu,

lolamandla ephelelwe ngamandla,

leqhawe kaliyikuzisiza;

15ophethe imitshoko kayikuqina,

lolejubane kayikuphunyuka,

logade ibhiza kayikuzikhulula;

16lolesibindi phakathi kwamaqhawe uzabaleka eze

ngalolosuku; kutsho iNkosi.