Jer 43 - Ndebele Bible (iBhayibhili Elingcwele) 1978

Abantu baya eGibithe

1Kwathi lapho uJeremiya eseqedile ukukhuluma ebantwini wonke lamazwi eNkosi uNkulunkulu wabo eyayimthume wona kibo,

2uAzariya indodana kaHoshaya, loJohanani indodana kaKareya, labo bonke abantu abazikhukhumezayo, bathi kuJeremiya: Uqamba amanga. INkosi uNkulunkulu wethu kayikuthumanga ukuba uthi kithi: Lingayi eGibithe ukuba lihlale khona;

3kodwa uBaruki indodana kaNeriya uyakuxabanisa lathi ukuba asinikele kumaKaladiya ukuze asibulale, kumbe asithumbe asise eBabiloni.

4Ngakho uJohanani indodana kaKareya, lazo zonke induna zempi, labo bonke abantu kabalilalelanga ilizwi leNkosi ukuba bahlale elizweni lakoJuda.

5UJohanani indodana kaKareya lazo zonke induna zempi bathatha bonke abaseleyo bakoJuda ababebuyele ukuhlala elizweni lakoJuda bevela kuzo zonke izizwe ababexotshelwe kuzo, baya labo eGibithe,2 Kho 25:26

6amadoda, labafazi, labantwana, amadodakazi enkosi, bonke abantu uNebuzaradani induna yabalindi ayebatshiye kuGedaliya indodana kaAhikamu, indodana kaShafani; bathatha loJeremiya umprofethi loBaruki indodana kaNeriya.

7Bayafika eGibithe, ngoba kabalilalelanga ilizwi leNkosi; bafikela eTahafanesi.

8Laselifika ilizwi leNkosi kuJeremiya eseTahafanesi,

9lathi: Thatha amatshe amakhulu, uwabhade endaweni egandelweyo ngasesangweni lesigodlo sikaFaro eTahafanesi, phambi kwabantu bakoJuda,

10uthi kibo: INkosi yamabandla, uNkulunkulu kaIsrayeli, ithi: Ngizabiza uNebukadineza inkosi yaseBabiloni inceku yami; uzamisa isihlalo sakhe sobukhosi phezu kwalamatshe engiwabekileyo, amise ithente lakhe phezu kwawo.

11Uzafika, ahlasele ilizwe laseGibithe, labo abamiselwe umkhuhlane abanikele emkhuhlaneni, abamiselwe ukuthunjwa abanikele ekuthunjweni, labamiselwe umkhonto abanikele emkhontweni;

12aphembe umlilo emathempelini abonkulunkulu baseGibithe, abatshise, abathumbe, alicuthe ilizwe laseGibithe njengomalusi ecutha isigqoko sakhe esigcwele izibungu, asuke khona esenqobile.

13Uzakwaphula insika zokukhonzela zaseHeliyopolisi elizweni laseGibithe, atshise ngomlilo amathempeli abonkulunkulu baseGibithe.