Hos 12 - Ndebele Bible (iBhayibhili Elingcwele) 1978

Ukungathembeki kukaIsrayeli loJuda

1UEfrayimi uhamba lomoya,

alandele umoya wasempumalanga usuku lonke;

bayandisa amanga lesihluku,

benze isivumelwano leAsiriya,

base amafutha eGibithe.

2INkosi ilecala loJuda,

izamtshaya uJakobe ngokufanele indlela zakhe,

imphindisele ngokufanele izenzo zakhe.

3Lasesiswini waphica umfowabo,

eseyindoda wabindana loNkulunkulu.

4Wabindana lesithunywa wanqoba,

wakhala ecela umusa kuso.

Wahlangana loNkulunkulu eBetheli,

uNkulunkulu wakhuluma laye lapho.

5UyiNkosi, uNkulunkulu wamabandla, yiNkosi ibizo lakhe.

6Ngakhoke, wena, ngokusizwa nguNkulunkulu wakho, buyela,

ubambelele othandweni lakokufaneleyo,

uthembe kuNkulunkulu wakho njalonjalo.

7INkosi ithi: Wena Israyeli, unjengomthengi ophethe izilinganiso ezikhohlisayo othanda ukuqilibizela.

8UEfrayimi uthe: Senginothile, ngizizuzele inotho.

Kodwa yonke inotho yakhe ingelihlawulele icala alenzileyo.

9Mina ngiyiNkosi, uNkulunkulu wakho,

kusukela ekuhlaleni kwakho eGibithe.

Ngisazakukuhlalisa emathenteni njengensukwini zasendulo.

10Ngakhuluma kubaprofethi, yimi engandisa imibono,

ngakhuluma ngemifanekiso ngabaprofethi.

11Kwakukhonzwa izithombe eGileyadi na?

Yebo, babonakele, bahlabela onkulunkulu bezinkunzi eGiligali.

Ama‐altare abo anda njengenqumbi zamatshe emasimini.

12UJakobe wabalekela elizweni laseAramu,

lapho uIsrayeli asebenzela khona ukuthola umfazi,

welusa izimvu ngenxa yomfazi.

13INkosi yamkhupha uIsrayeli eGibithe ngomprofethi,

walondolozwa ngumprofethi.

14UEfrayimi ucunule kabuhlungu;

ngakho iNkosi yakhe izakwehlisela phezu kwakhe icala lakhe legazi,

ibuyisele kuye inhlamba yakhe.