Hubo 103 - Ndebele Bible (iBhayibhili Elingcwele) 1978

Ukubonga iNkosi ngothando lwayo

1Ibonge iNkosi, mphefumulo wami,

lakho konke okuphakathi kwami kakubonge ibizo layo elingcwele.

2Ibonge iNkosi, mphefumulo wami,

ungakhohlwa yilokho ekusize ngakho,

3yona ethethelela zonke izono zami,

eyelapha zonke izifo zami,

4ehlenga ukuphila kwami ekubhujisweni,

engihanqa ngothando olungapheliyo langesihawu,

5esuthisa ukulangatha kwami ngokuhle,

ukuze ubutsha bami buhlunyeleliswe njengobokhozi.

6INkosi iyabenzela ukulunga

lokufaneleyo bonke abacindezelweyo.

7Yamazisa uMose indlela zayo,

labantu bakoIsrayeli izenzo zayo.

8INkosi ilobubele lesihawu,

iyaphuza ukuthukuthela,

igcwele uthando olungapheliyo.

9Kayiyikuthetha njalonjalo,

kayiyikuhlala ithukuthele kuze kube nininini.

10Kayisiphathi njengokufanele izono zethu,

kayisiniki lowomvuzo ofanele ukungalungi kwethu.

11Ngoba njengoba amazulu ephakeme phezu komhlaba,

lunjaloke lothando lwayo olungapheliyo kubo abayesabayo.

12Njengoba impumalanga yahlukene lentshonalanga,

ngokunjaloke izisusele khatshana lathi iziphambeko zethu.

13Njengoyise ehawukela abantwana bakhe,

ngokunjaloke iNkosi iyabahawukela bona abayesabayo.

14Ngoba iyakwazi ukubunjwa kwethu;

iyakhumbula ukuthi siluthuli nje.

15Umuntu yenake insuku zakhe zinjengotshani;

uyakhahlela njengamaluba eganga;

16umoya uyadlula phezu kwawo, abesenyamalala,

angabe esaziwa lasendaweni yawo.

17Kodwa uthando olungapheliyo lweNkosi

lumi kuze kube nininini kubo abayesabayo,

lokulunga kwayo kumi kuze kube sebantwaneni babantwana,

18kubo abagcina isivumelwano sayo,

bekhumbula imithetho yayo ukuba bayilalele.

19INkosi imisile isihlalo sayo sobukhosi emazulwini,

lombuso wayo uphezu kwakho konke.

20Ibongeni iNkosi, lina zithunywa zayo,

lina maqhawe ayo elizwa ilizwi layo,

lilalela ukukhuluma kwelizwi layo.

21Ibongeni iNkosi, lina lonke mabandla ayo,

lina zinceku zayo ezenza intando yayo.

22Ibongeni iNkosi lina lonke misebenzi yayo,

endaweni zonke zombuso wayo.

Ibonge iNkosi, mphefumulo wami.