Isa 15 - Ndebele Bible (iBhayibhili Elingcwele) 1978

Ukukhalela iMowabi

1Leli yilizwi ngeMowabi.

Ngobusuku iAri elanqotshwa

ngabo loMowabi wachitheka;

langobusuku iKiri elanqotshwa ngabo loMowabi wachitheka.

2Abantu baseDiboni bakhwela endaweni eziphakemeyo zokukhonzela ukuyakhala;

abantu baseMowabi bakhalela iNebo leMedeba;

bonke baphucile amakhanda, bagela lezindevu;

3ezindleleni bahamba begqoke izambatho zokulila;

bayakhala izinyembezi phezu kwezindlu lasezigabeni.

4IHeshiboni leEleyale kuyadazuluka,

lelizwi labo lizwakala khatshana eJahazi;

ngakhoke amabutho eMowabi ayadazuluka,

inhliziyo kaMowabi ithuthumele.

5Inhliziyo yami iyamkhalela uMowabi;

ababalekileyo bakhe babalekela eZowari.

Abanye bakhwela emawatheni eLuhithi bekhala;

labanye basendleleni yaseHoronayimi bedazuluka.

6Amanzi omfula iNimrimi acitshile,

lotshani buyoma, uhlaza luyaphela,

kakusekho okuluhlaza.

7Ngakhoke konke lokho abakuzuzileyo kanye lempahla yabo bayakususa,

bakuwelise iSifula semiDubu.

8Ngoba ukukhala kugcwele lonke ilizwe laseMowabi,

ukulila kufika eEgilayimi laseBeri‐Elimi.

9Ngoba amanzi aseDiboni agcwele igazi;

kanti ngisazakwehlisela eDiboni okunye futhi,

ngitsho isilwane kulabo abaseMowabi abaseleyo.