Hez 23 - Ndebele Bible (iBhayibhili Elingcwele) 1978

Odade ababili

1Ilizwi leNkosi lafika kimi lathi:

2Ndoda, kwakukhona abesifazana ababili, amadodakazi omfazi munye.

3Bawula eGibithe, bawula ebutsheni babo, babanjwa amabele abo lamathangazi abo.

4Omdala wayethiwa nguOhola, lomnawakhe wayethiwa nguOholiba. Baba ngabami, bangizalela amadodana lamadodakazi. UOhola uliSamariya, loOholiba uliJerusalema.

5UOhola wawula esesengowami, wakhanuka izithandwa zakhe amaAsiriya,

6amabutho agqoke okuyibubende, lababusi lezinduna zempi, bonke bengamajaha athandekayo, labakwaziyo ukugada amabhiza.

7Wawula labo, ikhethelo labantu baseAsiriya; wazingcolisa ngazo zonke izithombe zabo bonke ayebakhanuka.

8Kakuyekelanga ukuwula kwakhe akwenza kusukela enzukwini zakhe eGibithe, ngoba ebutsheni bakhe amadoda alala laye, abamba amathangazi akhe, akholisa ukukhanuka kwawo kuye.

9Ngalokhoke ngamnikela ezandleni zezithandwa zakhe, ezandleni zamaAsiriya awakhanukayo.

10Wona amnqunulisa, abamba amadodana lamadodakazi akhe, ambulala ngomkhonto; waba yisiga phakathi kwabesifazana emva kokuthonisiswa kwakhe.

11Umnawakhe uOholiba wakubona lokhu, yena wayemubi kulaye ekukhanukeni kwakhe lasekuwuleni kwakhe, okwakusedlula okukadadewabo.

12Wakhanuka amaAsiriya, ababusi lezinduna zempi, lamabutho agqoke izigqoko zensimbi, labagadi bamabhiza abagadileyo, bonke bengamajaha abukekayo.

13Ngabona ukuthi ungcolisiwe; bobabili babehamba unyawo lunye.

14Kodwa yena wengezelela ekuwuleni kwakhe. Wabona abesilisa befanekisiwe emdulini, izithombe zamaKaladiya zifanekisiwe ngokubomvu,

15zibotshwe ngamabhanti ezinkalweni zazo, zilamaqhiye alengayo emakhanda azo, zonke zikhangeleka njengezinduna, kungumfanekiso wamaBabiloni azalelwa eKaladiya.

16Lapho ebabona, wabakhanuka, wabathumela izithunywa eKaladiya.

17AmaBabiloni afika, alala laye, amngcolisa ngenkanuko zawo; emva kokungcoliswa kwakhe wawatshiya esenengiwe yiwo.

18Lapho ewula ngokusobala, echaya ubunqunu bakhe, ngamtshiya senginengwe nguye njengalokhu ngamtshiya udadewabo.

19Kodwa wandisa ukuwula kwakhe, wakhumbula insuku zobutsha bakhe ezokuwula kwakhe elizweni laseGibithe,

20ekhanuka izithandwa zakhe khona, ezilezitho ezifana lezabobabhemi, lenzalo yazo ifana leyamabhiza.

21Ngakho wena Oholiba watshisekela amanyala obutsha bakho lapho amaGibithe ayebamba amathangazi akho lamabele akho.

22Ngalokhoke, wena Oholiba, iNkosi uNkulunkulu ithi: Khangela, ngizakukuvusela izithandwa zakho owazitshiya usunengwa yizo, ngizilethe kuwe zivela inxa zonke,

23amaBabiloni lamaKaladiya wonke, amadoda asePekodi leShowa leKowa, lawo wonke amaAsiriya, amajaha abukekayo, ababusi lezinduna zamabutho, bonke ngoluthi lwabo, izinduna lamabutho, bonke begade amabhiza.

24Bazakuza kuwe bevela ngasenyakatho belenqola zokulwa lezinqola zokuthwala impahla, lexuku labantu, bakuhanqe indawo zonke belamahawu lezihlangu lengowane; ngizabanika amandla okuthonisisa, bazakukuthonisisa ngezabo indlela zokuthonisa.

25Ngizakwenzela umona ukuba bakuphathe ngolaka. Bazaquma impumulo yakho lendlebe zakho, labaseleyo emzini wakho babulawe. Bazathumba amadodana lamadodakazi akho, labaseleyo emzini wakho batshiswe ngomlilo.

26Bazakukukhumula lawe izigqoko zakho, bathathe iziceco zakho ezinhle.

27Ngokunjalo ngizaqeda amanyala akho lokuwula kwakho owasuka lakho eGibithe, ukuze ungabe usakhanuka amaGibithe futhi, uwakhumbule.

28INkosi uNkulunkulu ithi: Ngizakukunikela ezandleni zalabo obazondayo, ezandleni zalabo owabatshiya usunengiwe yibo.

29Bazakukuzonda, bakuphathe kubi, bakuthathele zonke izithelo zomsebenzi wakho, usale unqunu uze, lokuwula kwakho kuvele obala.

30Amanyala akho lokuwula kwakho kukwehlisele lokho, ngoba uwulile lezizwe, wazingcolisa ngezithombe zazo.

31Ulandele indlela kadadewenu; ngalokho ngizakukunika inkezo yakhe yokujeziswa.

32INkosi uNkulunkulu ithi:

Uzanatha inkezo kadadewenu ezikileyo lebanzi;

uzahlekwa ube yinhlekisa,

ngoba igcwele okunengi;

33uzadakwa ube losizi.

Inkezo kadadewenu iSamariya iyinkezo yokwesaba lokuchitheka.

34Uzakuyinatha uyibhije,

uyiphahlaze ibe yizicucu,

udabule amabele akho.

Sengikhulumile,

kutsho iNkosi uNkulunkulu.

35Ngalokho iNkosi uNkulunkulu ithi: Ngoba ungikhohliwe, wangilahla nyovane, thwala umvuzo wamanyala akho lokuwula kwakho.

36INkosi yathi kimi: Ndoda, uzathonisisa uOhola loOholiba na? Batsheleke izenzo zabo ezingamanyala.

37Ngoba bafebile, lezandla zabo zigcwele igazi. Bafebile lezithombe zabo, banikela kuzo lamadodana abangizalele wona abe yikudla kwazo.

38Futhi benze lokho kimi, bangcolisa indlu yami engcwele, bona lamaSabatha ami.

39Ngoba ekubulaleni abantwana babo ukuba babe ngumhlatshelo wezithombe zabo, bangena endlini yami engcwele bayingcolise. Yikho lokho abakwenza endlini yami.

40Babiza abantu ukuba beze bevela khatshana, okwathunyelwa kibo isithunywa, labo beza. Wabagezela, wacomba amehlo akho, wagqiza iziceco zakho.

41Wahlala ethaleni elihle eliletafula phambi kwalo, owabeka kulo impepha yami lamafutha ami.

42Wawumkhulu umsindo wexuku elithokozayo; kanye labantukazana kwakukhona labaseSheba ababevela enkangala, befake amasongo ezandleni zabesifazana lemiqhele emihle emakhanda abo.

43Ngasengisithi: Yeka lo owesifazana osejwayele ukufeba! Sebezakufeba laye, bafebe laye yena lo.

44Ngoba baye kuye njengoba kuyiwa ewuleni. Ngokunjalo baya kuOhola lakuOholiba ukwenza amanyala.

45Kodwa abantu abalungileyo bazabathonisisa, babagwebe ngesigwebo esifanele isifebekazi, langesigwebo esifanele abesifazana abachitha igazi; ngoba beyizifebekazi, lezandla zabo zigcwele igazi.

46INkosi uNkulunkulu ithi: Baletheleni ixuku, libenze into eyesabekayo lempango.

47Ixuku lizabakhanda ngamatshe, libaqedisele ngemikhonto yalo, lizabulala amadodana lamadodakazi abo, litshise lezindlu zabo.

48Ngokunjalo ngizaqeda amanyala elizweni ukuze bonke abesifazana baxwayiseke, bangenzi amanyala njengani.

49Amanyala enu azaphindiselwa phezu kwenu, lithwale umvuzo wokuwula kwenu okubi. Lizakwazi ukuba ngiyiNkosi uNkulunkulu.