Jer 4 - Ndebele Bible (iBhayibhili Elingcwele) 1978

1Uba uphenduka, wena Israyeli, kutsho iNkosi, phendukela kimi.

Uba ususa phambi kwami izinengiso zakho,

ungasuki kimi,

2futhi uba ufunga ngeqiniso langokulunga langokuqonda uthi: Ngifunga iNkosi;

izizwe zizabusiswa kuyo, zizibonge ngayo.

3Ngoba iNkosi ithi ebantwini bakoJuda labaseJerusalema:

Qhathani ingqatho yenu, lingahlanyeli phakathi kwameva.

4Zisokeleni eNkosini,

ukusoka kwenu kube ngokwenhliziyo,

lina bantu bakoJuda labaseJerusalema,

funa ulaka lwami luphembeke njengomlilo,

luthungele, kungabi khona ongalucitsha,

ngenxa yezenzo zenu ezimbi.

Ilizwe lakoJuda lizakuhlaselwa

5Khulumani koJuda, limemeze eJerusalema lithi:

Khalisani uphondo elizweni, limemeze kakhulu lithi:

Buthanani, singene emizini ebiyelweyo.

6Misani uphawu olukhomba iZiyone,

libaleke lingemi,

ngoba ngiletha okubi okuvela ngasenyakatho, lokuchitheka okukhulu.

7Isilwane siphumile ehlathini laso,

umchithi wezizwe uyeza,

uphumile endaweni yakhe ukuba achithe ilizwe lakho;

lemizi yakho izakuba ngamanxiwa, kungabi khona umuntu kuyo,

8Ngenxa yalokho yambatha izambatho zokulila, ukhale ulile;

ngoba ulaka lweNkosi olwesabekayo kaluhlehlanga kithi.

9Kuzakuthi ngalolosuku, kutsho iNkosi, amakhosi aphelelwe yisibindi kanye lezikhulu; abapristi bazamangala, labaprofethi bethuke.

10Ngasengisithi: Hawu, Nkosi Nkulunkulu! ubakhohlisile impela lababantu kanye leJerusalema ngokuthi: Lizakuba lokuthula; kanti impi isiphezu kwabo.

11Ngalesosikhathi kuzakuthiwa kulabobantu lakulo iJerusalema: Umoya otshisayo ovela enkangala emadundulwini angelalutho, uyavunguza phezu kwabantu bami, ungesiwo wokwela lokuhlungula,

12kodwa umoya olamandla, uyeza uthunywe yimi. Mina uqobo ngizakubagweba.

13Khangela, umufo uyeza njengamayezi,

inqola zakhe zokulwa zinjengesivunguzane,

lamabhiza akhe alejubane kulokhozi.

Maye babo, ngoba sichithekile!

14Wena Jerusalema, hlambulula inhliziyo yakho kuphume ububi,

ukuze uphephe.

Koze kube nini imicabango yakho emibi ihlala phakathi kwakho na?

15Ngoba ilizwi liyamemeza lisuka koDani,

libika okubi kuvela ezintabeni zakoEfrayimi.

16Xwayisani izizwe ukuthi uyeza,

bikani kulo iJerusalema lithi:

Kufika abavimbezeli bevela elizweni elikhatshana;

bayamemeza kuyo imizi yakoJuda.

17Njengabalindi bensimu balihanqa inxa zonke,

ngoba lingihlamukele, kutsho iNkosi.

18Ukuhamba kwakho lezenzo zakho kukulethele lokho.

Lokhu kuyikuphela kwakho, kubuhlungu,

sekufinyelele enhliziyweni yakho uqobo.

19Ngilobuhlungu obukhulu,

ngiyazitshila ngenxa yobuhlungu.

Maye inhliziyo yami!

Inhliziyo yami iyatshaya, kangilakuthula;

ngoba ngizwile ukukhala kophondo, lomkhosi wempi.

20Ukuchitheka kulandela ukuchitheka,

ilizwe lonke lichithekile.

Amathente ethu adilikile masinyane,

lamaveli awo ngesibangana nje.

21Koze kube nini ngibona uphawu lwempi,

ngizwe ukukhala kophondo?

22Abantu bami bayizithutha, kabangazi;

bangabantwana abayiziphukuphuku, kabalakuqedisisa.

Bahlakaniphele ukwenza okubi,

kodwa ukwenza okuhle kabakwazi.

23Ngakhangela umhlaba, wawuze ungelalutho,

lephezulu lalingelakukhanya.

24Ngakhangela izintaba, zazinyikinyeka,

lamaqaqa wonke ayenyakazela.

25Ngakhangela, ngabona ukuthi kakulamuntu,

lenyoni zonke zaphezulu zasezibalekile.

26Ngakhangela, ngabona ukuthi ilizwe elivundileyo liyinkangala,

lemizi yalo yonke yayidiliziwe phambi kweNkosi,

laphambi kolaka lwayo oluvuthayo.

27Ngoba iNkosi ithe: Ilizwe lonke lizachitheka,

kodwa kangizukuliqeda ngokupheleleyo.

28Ngenxa yalokho umhlaba uzalila,

lephezulu libe mnyama;

ngoba sengikukhulumile engikuqondileyo;

kangiyikuzisola, ngibuyele emuva.

29Imizi yonke iyabaleka ngenxa yomsindo wabagadi bamabhiza

labaphathi bemitshoko;

bangena ezixukwini bakhwele emadwaleni,

imizi yonke isele ize, kakho ohlala kiyo.

30Wenake, uzakwenzani na?

Loba ugqoka okubomvu, ufaka izigqizo zegolide,

ugcoba amehlo akho ngomuthi,

uzicecisela ize, ngoba izithandwa zakho ziyakudelela,

zifuna ukukubulala.

31Ngoba ngizwile ilizwi kungathi ngelowesifazana ohelelwayo,

ukukhala okubuhlungu okunjengokozibulayo;

yikukhala kweZiyone elikhefuzelayo,

liselula izandla zalo lisithi:

Maye mina! ngiphelelwa ngamandla ngoba nampa ababulali bayeza.