Zaga 12 - Ndebele Bible (iBhayibhili Elingcwele) 1978

1Othanda ukulaywa uthanda ukwazi;

kodwa ozonda ukukhuzwa uyisithutha.

2Olungileyo uthola umusa eNkosini,

kodwa oceba okubi iNkosi iyamlahla.

3Kakulamuntu ongamiswa yibubi,

kodwa kakulalutho olungaquphula impande zabalungileyo.

4Umfazi olungileyo uludumo lwendoda yakhe,

kodwa oyithela ihlazo unjengokubola kwamathambo ayo.

5Amacebo abalungileyo alungile;

amaqhinga ababi ayinkohliso.

6Amazwi ababi alamandla okubhubhisa,

kodwa amazwi abaqotho ayabophula.

7Ababi bayachithwa, bangabe besaba khona,

kodwa indlu yabalungileyo iyema.

8Umuntu uyadunyiswa ngokuhlakanipha kwakhe,

kodwa olenhliziyo embi uyadelelwa.

9Umuntu othobekileyo ozisebenzelayo

ungcono kulozitshaya umuntu omkhulu eswele ukudla.

10Olungileyo unanzelela imfuyo yakhe,

kodwa umuntu omubi ulolunya.

11Olima insimu yakhe uzakuba lokudla okunengi,

kodwa owenza imisebenzi eyize kalangqondo.

12Inqaba yababi izakudilika,

kodwa abalungileyo bazakuba lempande ezingapheliyo.

13Omubi ubanjwa ngamazwi akhe amabi,

kodwa olungileyo uyaphepha engozini.

14Umuntu uzuza umvuzo omuhle ngamazwi akhe,

athole okumfaneleyo ngomsebenzi wezandla zakhe.

15Isithutha sithi indlela yaso ilungile,

kodwa olalela izeluleko uhlakaniphile.

16Isithutha sitshengisa intukuthelo yaso masinyane,

kodwa ohlakaniphileyo nxa ethukwa kananzi.

17Okhuluma iqiniso ufakaza ngeqiniso,

kodwa ufakazi wamanga ukhuluma inkohliso.

18Amazwi ababhudayo ahlaba njengomkhonto,

kodwa inlimi zabahlakaniphileyo ziyasilisa.

19Iqiniso nxa likhulunywa lima kokuphela,

kodwa amanga ahlala umzuzu nje.

20Abaceba okubi balenhliziyo ezikhohlisayo,

kodwa abaceba okuhle balokuthokoza.

21Abalungileyo kabehlelwa ngokubi,

kodwa ababi bagcwele izinhlupheko.

22Abaqamba amanga bayisinengiso eNkosini,

kodwa abenza iqiniso bayayithabisa.

23Ohlakaniphileyo ufihla ukwazi kwakhe,

kodwa izithutha zitshumayela ubuthutha bazo.

24Abakhutheleyo bazakubusa,

kodwa abangamavila bazasetshenziswa nzima.

25Ukukhathazeka kwenhliziyo kuyamdanisa umuntu,

kodwa ilizwi elihle liyamthokozisa.

26Olungileyo uxwaya ububi,

kodwa indlela yababi iyabaduhisa.

27Umzingeli olivila kabambi lutho,

kodwa isikhuthali sizuza inotho.

28Indlela yokulunga iyikuphila,

kodwa indlela yobubi iyikufa.