uNahume 2 - Ndebele Bible (iBhayibhili Elingcwele) 1978

1Umchithi ukufikele, wena Nineve,

gcina inqaba zakho, ulinde indlela,

ume isibindi, uqinise amandla akho.

2— Ngoba iNkosi ibuyisa ubukhosi bukaJakobe bube njengobukhosi bukaIsrayeli;

ngoba abahlaselayo balikhwexule ivini, baqeda ingatsha zalo —

3Izihlangu zamaqhawe akhe zibomvu,

amabutho akhe agqoke okuyibubende,

lenqola zakhe zokulwa ziphazima njengamalangabi

lapho sezilungiselwa ukulwa;

amabhiza ayagidagida.

4Inqola zokulwa ziyatheleka emigwaqweni,

ziphoseka le lale ezigcawini,

zikhanye njengezibane, ziphazime njengemibane.

5Kubizwe izinduna,

zikhubeke ekuhambeni kwazo,

zigijimele emithangaleni, zimise izivikelo.

6Kuvulwe amasango asemfuleni, kube yisiyaluyalu esigodlweni.

7Inkosikazi ithunjwe,

incekukazi zayo zikhale njengamajuba,

zitshaye izifuba zazo ngenxa yosizi.

8INineve injengechibi elilamanzi afohlayo.

Bamemeza besithi: Manini! manini!

kodwa kakho ophendukayo.

9Phangani isiliva, phangani igolide.

Inotho yalo lezinto zalo ezinhle kazilakuphela.

10Seliseleze, kaliselalutho, lichithekile;

inhliziyo ziphele amandla, amadolo ayatshayana,

bonke batshaywa luvalo, banyukumele.

11Singaphi isikhundla sesilwane lezimbalu zezilwane

lapho isilwane sasiletha khona esikubambileyo,

lalapho imidlwane yaso yayihlala khona ingethuki lutho na?

12Isilwane sabamba okwanele imidlwane yaso,

sabambela lezilwanekazi zaso;

sagcwalisa izimbalu ngesikubambileyo

lezikhundla zaso ngenyama.

13Khangela, ngimelene lawe, kutsho iNkosi yamabandla;

ngizatshisa ngomlilo inqola zakho zokulwa,

lomkhonto uzaqeda imidlwane yakho;

ngizaqeda emhlabeni konke okubambayo,

lelizwi lezithunywa zakho kalisayikuzwakala.