Hlu 6 - Ndebele Bible (iBhayibhili Elingcwele) 1978

Ukubizwa kukaGidiyoni

1AbakoIsrayeli benza okubi phambi kweNkosi; iNkosi yabanikela ezandleni zamaMidiyani iminyaka eyisikhombisa.

2AmaMidiyani ayelamandla kulabakoIsrayeli; abakoIsrayeli bacatsha ezimbalwini zezintaba, emihomeni lezinqabeni ngenxa yamaMidiyani.

3Kwakuthi lapho abakoIsrayeli sebelima, amaMidiyani lamaAmaleki labantu basempumalanga babahlasele,

4babemisa phakathi kwelizwe, bachithe izithelo zelizwe, baze bayefika phansi kweGaza bengatshiyi ukudla koIsrayeli lezimvu lenkomo labobabhemi.

5Ngoba babefika lenkomo zabo lamathente abo, befika njengentethe ngobunengi; bona lamakamela abo babengelakubalwa; ngakho beza elizweni ukulichitha.

6AbakoIsrayeli baphela amandla ngenxa yamaMidiyani, bakhala eNkosini ukuba ibasize.

7Lapho abakoIsrayeli bekhala eNkosini ngenxa yamaMidiyani,

8iNkosi yabathumela umprofethi owathi kibo: INkosi, uNkulunkulu wakoIsrayeli, ithi: Ngalikhupha eGibithe lasendaweni yobugqili,

9ngalikhulula ezandleni zamaGibithe, lezandleni zabo bonke abalicindezelayo, ngabaxotsha phambi kwenu, ngalinika ilizwe labo,

10ngathi kini: NgiyiNkosi uNkulunkulu wenu, kaliyikukhonza onkulunkulu bamaAmori elihlala elizweni lawo. Kodwa kalililalelanga ilizwi lami.

11Kwasekufika isithunywa seNkosi, sahlala ngaphansi kwesihlahla esikhulu eOfira, esasingesikaJowashi umAbiyezeri, indodana yakhe uGidiyoni yayibhula amabele esikhamelweni sewayini, iwafihlele amaMidiyani.

12Isithunywa seNkosi sabonakala kuye, sathi kuye: INkosi ilawe, wena qhawe elilamandla.

13UGidiyoni wathi kuso: E nkosi, uba iNkosi ilathi, konke lokhu kusehlele ngani na? Zingaphi zonke izenzo zayo ezimangalisayo abasitshela ngazo obaba besithi: INkosi kayisikhuphanga eGibithe na? Kodwa khathesi iNkosi isisilahlile, yasinikela ezandleni zamaMidiyani.

14INkosi yasiphendukela kuye isithi: Hamba ngalamandla akho, ukhulule uIsrayeli ezandleni zamaMidiyani; yimi engikuthumayo.

15Yena wathi kuyo: E nkosi, ngingamkhulula kanjani uIsrayeli? Khangela, usendo lwakwethu luncinyane koManase, mina ngingomncinyane endlini yakwethu.

16INkosi yathi kuye: Mina ngizakuba lawe, uzawabulala amaMidiyani kungathi angumuntu munye.

17Yena wasesithi kuyo: Uba ngifumene umusa kuwe, akunginike isibonakaliso sokuthi nguwe okhuluma lami.

18Ungasuki lapha, ngiyakuncenga, ngize ngibuye kuwe ngilethe isipho sami, ngisibeke phambi kwakho. Yona yathi: Ngizahlala uze ubuye.

19UGidiyoni wasehamba, wahlaba izinyane, wenza izinkwa ezingelamvubelo ngehefa lempuphu, wafaka inyama esitsheni, wathela umhluzi embizeni, wakuletha kuyo ngaphansi kwesihlahla esikhulu, wayinika.

20Isithunywa sikaNkulunkulu sathi kuye: Thatha inyama lezinkwa ezingelamvubelo, ukubeke phezu kwalelidwala, ubusuthela umhluzi phezu kwakho. Wenza njalo.

21Isithunywa seNkosi sakhomba ngobhulo esasiluphethe, sathinta ngesihloko salo inyama lezinkwa ezingelamvubelo; kwasekuvutha umlilo edwaleni, watshisa inyama lezinkwa ezingelamvubelo. Isithunywa seNkosi sasesinyamalala phambi kwakhe.

22UGidiyoni wasebona ukuthi bekuyisithunywa seNkosi, wathi: Maye mina, Nkosi Nkulunkulu! Ngoba ngikhangelene lesithunywa seNkosi ubuso ngobuso.

23Kodwa iNkosi yathi kuye: Ukuthula kakube kuwe, ungesabi, kawuyikufa.

24UGidiyoni waseyakhela iNkosi ialtare lapho, walibiza ngokuthi iNkosi ilokuthula. Lisekhona lalamhla eOfira lamaAbiyezeri.

25Ngalobobusuku iNkosi yathi kuye: Thatha inkunzi kayihlo esijoqile, udilize ialtare likaBali elingelikayihlo, ugamulele phansi insika kankulunkulukazi uAshera ephansi kwalo;

26uyakhele ialtare iNkosi uNkulunkulu wakho phezu kwenqwaba, wakhe kuhle ngamatshe; ubusuthatha inkunzi, unikele ngayo ibe ngumnikelo wokutshiswa ngezigodo zensika ozayigamula.

27UGidiyoni wasethatha inceku zakhe ezilitshumi, wenza njengokutsho kweNkosi kuye; kodwa ngenxa yokuthi wayesesaba abendlu yakwabo labantu bomuzi kakwenzanga emini, wakwenza ebusuku.

28Kwathi lapho abantu bomuzi bevuka ekuseni kakhulu babona ialtare likaBali selidiliziwe, lensika eyayiphansi kwalo isiganyulwe, kunikelwe inkunzi phezu kwealtare elaselakhiwe.

29Bakhulumisana besithi: Ngubani owenze lokhu na? Nxa sebedingile bebuza batshelwa ukuthi nguGidiyoni indodana kaJowashi owenze lokhu.

30Ngakho abantu bomuzi basebesithi kuJowashi: Khupha indodana yakho ukuba siyibulale, ngoba idilizile ialtare likaBali, yagamula lensika ebiphansi kwalo.

31Kodwa uJowashi wathi kubo bonke ababembuthanele: Lizamlwela uBali yini, kumbe limvikele na? Lowo omlwelayo uzabulawa ekuseni. Uba yena engunkulunkulu, kazilwele yena, ngoba ialtare lakhe lidiliziwe.

32Ngakho ngalolosuku wambiza uGidiyoni ngokuthi nguJerubali, wathi: UBali kalwe laye, ngoba ulidilizile ialtare lakhe.

33AmaMidiyani lamaAmaleki labantu basempumalanga babuthana, bachapha iJordani, bamisa esigodini saseJezereli.

34Umoya weNkosi wehlela kuGidiyoni; wakhalisa uphondo, amaAbiyezeri abizwa ukumlandela.

35Ngakho wathuma izithunywa kulo lonke elakoManase, labo babizwa ukumlandela. Wasezithuma koAsheri lakoZebuluni lakoNafitali, beza ukuhlangabeza abanye.

36UGidiyoni wasesithi kuNkulunkulu: Uba uzakhulula uIsrayeli ngesandla sami njengokutsho kwakho,

37khangela, ngiyabeka uboya esizeni; uba kukhona amazolo phezu koboya kuphela, komile phansi, ngizakwazike ukuba uzamkhulula uIsrayeli ngesandla sami, njengokutsho kwakho.

38Kwaba njalo. Lapho evuka ekuseni kusasa, wakhama uboya, kwaphuma amazolo eboyeni, agcwalisa umganu ngamanzi.

39UGidiyoni wasesithi kuNkulunkulu: Ungangithukutheleli, ngivumela ukuba ngikhulume kanye nje; ke ngihlole kanye kuphela ngalobuboya, akome oboyeni kuphela, kube manzi phansi.

40UNkulunkulu wenza njalo ngalobobusuku; kwakomile oboyeni kuphela, kodwa phansi kwakugcwele amazolo.