Jer 41 - Ndebele Bible (iBhayibhili Elingcwele) 1978

1Kwathi ngenyanga yesikhombisa uIshmayeli indodana kaNethaniya, kaElishama, owenzalo yenkosi, wafika lamadoda alitshumi kuGedaliya indodana kaAhikamu eMizipa. Kwathi besadla laye eMizipa,2 Kho 25:25

2uIshmayeli indodana kaNethaniya lamadoda alitshumi ayelaye bamgwaza ngomkhonto uGedaliya indodana kaAhikamu, kaShafani, bambulala, yena inkosi yaseBabiloni eyayimbeke ukuba ngumbusi elizweni.

3UIshmayeli wabulala labo bonke abaJuda ababeloGedaliya eMizipa, kanye lamabutho amaKaladiya ayekhona lapho.

4Ngosuku lwesibili sebembulele uGedaliya, kungakaziwa muntu,

5kwafika amadoda angamatshumi aficaminwembili evela eShekema leShilo leSamariya, ephucile indevu zawo, lezigqoko zawo zidatshuliwe, lemizimba yawo isikiwe, eletha iminikelo yempuphu kanye lempepha ukuyinikela ethempelini.

6UIshmayeli indodana kaNethaniya wasuka eMizipa ukuwahlangabeza, ehamba ekhala. Kwathi lapho ehlangana lawo, wathi kuwo: Wozani kuGedaliya indodana kaAhikamu.

7Kwathi esengenile emzini, uIshmayeli indodana kaNethaniya lamadodana ayelaye bawabulala, bawaphosela emgodini.

8Kodwa kwakulamadoda alitshumi phakathi kwawo athi kuIshmayeli: Ungasibulali, ngoba sileziphala ezigcwele amabele lebhali lamafutha kanye lenyosi, sikufihlile egangeni. Ngakho wawayekela, kaze awabulala.

9Umgodi uIshmayeli ayephosele kuwo izidumbu zabo bonke abantu ayebabulele, wawungumgodi omkhulu owawenziwe yinkosi uAsa ukuzivikela kuBahasha inkosi yakoIsrayeli. UIshmayeli indodana kaNethaniya wawugcwalisa ngezidumbu.

10UIshmayeli wasethumba bonke abantu ababesele eMizipa, amadodakazi enkosi labo bonke ababesele eMizipa, uNebuzaradani induna yabalindi ayebanikezele kuGedaliya indodana kaAhikamu. UIshmayeli indodana kaNethaniya wabathumba, wabasa kumaAmoni.

11Kodwa kwathi lapho uJohanani indodana kaKareya lazo zonke induna zamabutho ezazilaye besizwa konke okubi okwenziwe nguIshmayeli indodana kaNethaniya,

12bathatha abantu babo bonke, bayakulwa loIshmayeli. Bamfica echibini elikhulu eliseGibeyoni.

13Kwathi lapho bonke abantu ababeloIshmayeli bebona uJohanani indodana kaKareya lazo zonke induna zempi ezazilaye bathokoza.

14Basebephenduka abantu bonke uIshmayeli ayebathumbe eMizipa, babuya baya kuJohanani indodana kaKareya.

15Kodwa uIshmayeli indodana kaNethaniya waphunyuka kuJohanani lamadoda aficaminwembili, wabalekela kumaAmoni.

16UJohanani indodana kaKareya lazo zonke induna zamabutho ezazilaye bathatha bonke abantu ababesele uIshmayeli indodana kaNethaniya ayebathumbe eMizipa, esebulele uGedaliya indodana kaAhikamu, amadoda empi, labafazi, labantwana, labathenwa, labo uJohanani ayebuyele labo eGibeyoni.

17Basuka bayahlala eGeruthi‐Kimihamu eduze leBetlehema, bezama ukuya eGibithe,

18bebalekela amaKaladiya; ngoba babewesaba, ngoba uIshmayeli kaNethaniya wayebulele uGedaliya indodana kaAhikamu, inkosi yaseBabiloni eyayimbekile ukuba ngumbusi zelizwe.