Zaga 13 - Ndebele Bible (iBhayibhili Elingcwele) 1978

1Indodana ehlakaniphileyo ilalela ukulaya kukayise;

kodwa isideleli kasilaleli ukukhuzwa.

2Olungileyo uzuza okuhle ngamazwi akhe,

kodwa omubi ufisa ukwenza okubi.

3Onqanda umlomo wakhe ugcina ukuphila kwakhe;

ophophothayo uzakuchitheka.

4Olivila uyalamba, kazuzi lutho,

kodwa okhutheleyo uyanotha.

5Olungileyo uyawazonda amanga;

omubi uthelela inhloni lehlazo.

6Ukulunga kulinda umuntu oqotho,

kodwa ububi buchitha umuntu omubi.

7Omunye umuntu uzitshaya onothileyo, kanti kalalutho;

lomunye azitshaye ongumyanga, kanti unothile kakhulu.

8Umuntu onothileyo umele ukuzihlenga,

kodwa ongumyanga kasongelwa.

9Ukukhanya kwabalungileyo kukhanya kuhle,

kodwa ukukhanya kwababi kuzakucitshwa.

10Ukuziqakisa kwezideleli kuveza ukuxabana;

ukuhlakanipha kukwabathobekileyo.

11Inotho etholakala ngokuphangisa izakuphunguka,

kodwa oyizuza kancane kancane uyayandisa.

12Ithemba eliphuzayo ligulisa inhliziyo,

kodwa isifiso esigcwalisekileyo sinjengesihlahla esiletha ukuphila.

13Odelela izeluleko uzehlisela ingozi;

olalela imilayo uzakuvuzwa.

14Ukufundisa kohlakaniphileyo kungumthombo wokuphila

ukuba umuntu axwaye imijibila yokufa.

15Ukuqedisisa kuhle kuveza ukuthandwa;

indlela yabakhohlisayo izabachitha.

16Ohlakaniphileyo wenza konke ngokwazi,

kodwa isithutha sitshengisa obala ubuthutha baso.

17Isithunywa esibi silethela abantu ingozi,

kodwa isigijimi esithembekileyo sibalethela ukusila.

18Ongananzi ukufundiswa uzakwehlelwa yibuyanga lehlazo,

kodwa onanza ukukhuzwa uzakudunyiswa.

19Isifiso esigcwalisekileyo simnandi emphefumulweni.

Izithutha ziyala ukuphenduka ebubini.

20Ohamba labahlakaniphileyo uyahlakanipha,

kodwa ophelekezela izithutha uzakuhlupheka.

21Okubi kuthomana lezoni,

kodwa okuhle kulandela abalungileyo.

22Olungileyo utshiyela abantwana babantwana bakhe ilifa,

kodwa inotho yesoni ibekelwa abalungileyo.

23Ingqatho ingabanika abayanga ukudla,

kodwa lalokho kungachitheka ngenxa yokungalungi.

24Uyise ongasebenzisi uswazi uzonda umntanakhe,

kodwa omthandayo uyamlaya.

25Olungileyo uyadla aze asuthe,

kodwa isisu somubi siyaswela.