Hos 13 - Ndebele Bible (iBhayibhili Elingcwele) 1978

Ukuchitheka kukaIsrayeli

1Kwakuthi lapho uEfrayimi ekhuluma, abantu bathuthumele,

wayemkhulu kuye wonke uIsrayeli;

kodwa wazehlisela icala ngokukhonza uBali, wafa.

2Khathesi sebesona kakhulu,

bazenzela izithombe ezibunjiweyo,

izithombe ezenziwe kuhle ngesiliva sabo,

zonke ziyimisebenzi yezingcitshi.

Bathi: Hlabelani lezi imihlatshelo.

Abantu banga izithombe zamathole.

3Ngalokhoke bazakuba njengenkungu yasekuseni,

babe njengamazolo aphela ekuseni,

njengomule ophephuka esizeni,

njengentuthu ethunqa ngetshimini.

4INkosi ithi: Mina ngiyiNkosi, uNkulunkulu wakho,

kusukela ekuhlaleni kwakho eGibithe;

kawumazi omunye uNkulunkulu ngaphandle kwami,

kakho omunye umsilisi ngaphandle kwami.

5Yimi engakulondoloza enkangala, elizweni lokoma.

6Kodwa nxa usudlile kakhulu, wasutha,

lenhliziyo yakho yazikhukhumeza;

wasungikhohlwa.

7Ngalokhoke ngizakuba njengesilwane kuwe,

njengengwe ngizakukucathamela,

8ngikudumele njengebhere elithathelwe imidlwane yalo,

ngidabule isifuba sakho,

ngikudlele lapho njengesilwane,

ngikudabudabule njengesilo.

9Ngizakukuchitha, Israyeli;

ngubani ongakusiza na?

10Ingaphi inkosi yakho khathesi ukuba ikusize?

Bangaphi ababusi bakho bonke ukuba bakuvikele?

labo owathi ngabo: Nginike inkosi lababusi.

11Ngikunikile amakhosi ekuthukutheleni kwami,

ngawasusa ngolaka lwami.

12Ububi bukaEfrayimi bulotshiwe ogwalweni,

lesono sakhe usibekelwe.

13Umhelo uyamfikela,

kodwa unjengomntwana oyisiphukuphuku,

othi isikhathi sakhe sesifikile, kodwa kaphumi esiswini.

14Ngizabahlawulela emandleni endawo yabafileyo yini?

ngibahlenge ekufeni na?

Kufa, zingaphi izifo zakho na?

Ndawo yabafileyo, kungaphi ukuchitheka kwakho?

Isihawu kasisekho kimi.

15Loba uIsrayeli ekhahlela phakathi kwemihlanga,

kuzafika umoya wasempumalanga,

isivunguvungu esivela eNkosini siphuma enkangala;

imithombo yakhe izakutsha,

kome lamaxhaphozi akhe;

sithathe inotho yakhe, izinto zonke eziligugu.

16ISamariya lizathwala icala lalo,

ngoba lihlamukile uNkulunkulu walo;

bazakubulawa yimpi, labantwana babo bachotshozwe,

labakhulelweyo babo baqhaqhwe.