Hubo 102 - Ndebele Bible (iBhayibhili Elingcwele) 1978

Umkhuleko womuntu olosizi

1Nkosi, zwana umkhuleko wami,

ukukhala kwami kakufinyelele kuwe.

2Ungangifihleli ubuso bakho osukwini losizi.

Ngizwa,

ungiphendule masinyane lapho ngikhuleka kuwe.

3Ngoba insuku zami ziyanyamalala njengentuthu,

lamathambo ami ayavutha njengesithando somlilo.

4Ngitshayiwe, ngabuna njengotshani;

inhliziyo yami imnyama.

5Ngenxa yokububula kwami

amathambo ami ayabonakala enyameni yami.

6Nginjengelinqe lasenkangala,

lanjengesikhova sezindawo ezidilikileyo.

7Kangilali,

nginjengenyoni ehlezi yodwa esicholo sendlu.

8Izitha zami ziyangithuka usuku lonke,

labo abangiklolodelayo bayathuka ngebizo lami.

9Ngoba ngidla umlotha,

ngixubanise okunathwayo kwami lezinyembezi

10ngenxa yentukuthelo lolaka lwakho;

ungiphakamisile, wangilahla.

11Insuku zami zinjengethunzi lakusihlwa,

ngiyabuna njengotshani.

12Kodwa wena, Nkosi, uzakubusa kuze kube nininini,

lebizo lakho lizakwaziwa kuzo zonke izizukulwana.

13Uzakuvuka uhawukele iZiyone;

sekuyisikhathi sokuliphatha ngomusa,

yebo, isikhathi esimisiweyo sesifikile.

14Ngoba izinceku zakho ziyawathanda amatshe alo,

zilesihawu othulini lwalo.

15Izizwe zizakulesaba ibizo leNkosi,

lamakhosi wonke omhlaba ubukhulu bayo.

16Ngoba iNkosi izakulakha iZiyone,

ibonakale ngobukhulu bayo;

17izakuzwa umkhuleko wabangelalutho,

kayiyikudelela ukucela kwabo.

18Lokhu kakulotshelwe isizukulwana esizayo,

ukuze kuthi abantu abangakabi khona bayidumise iNkosi.

19Ngoba ikhangele phansi isendaweni yayo engcwele,

iNkosi yakhangela emhlabeni isezulwini,

20ukuba izwe ukububula kwezibotshwa,

lokuba ikhulule labo abaqunyelwe ukufa;

21ukuze abantu batshumayele ibizo leNkosi eZiyone,

bayidumise eJerusalema,

22lapho izizwe zibuthana kanye lemibuso

ukuyikhonza iNkosi.

23Yanciphisa amandla ami ebutsheni bami,

yaphungula insuku zami.

24Ngithi: Nkulunkulu wami, ungangithathi

insuku zami zingakapheli,

wena oleminyaka ehlala izizukulwana zonke.

25Endulo wawusekela umhlaba,

lamazulu angumsebenzi wezandla zakho.

26Kuzakuphela lokho,

kodwa wena umi njalonjalo.

Kuzakuguga konke njengengubo,

wena uzakukulahla njengengubo, kuphele;

27kodwa wena unguwe njalo,

leminyaka yakho kayipheli.

28Abantwana bezinceku zakho bazakuhlala bevikelekile,

lenzalo yabo izakuma phambi kwakho.