Levi 3 - Ndebele Bible (iBhayibhili Elingcwele) 1978

Iminikelo yokuthula

1Uba umnikelo womuntu ungumhlatshelo womnikelo wokuthula, nxa enikela ngenkomo, enduna ingabe ensikazi, kawunikele phambi kweNkosi ungelasici.

2Uzakubeka isandla sakhe ekhanda lomnikelo wakhe, awuhlabe ngasemnyango wethente lokuhlangana; amadodana kaAroni angabapristi akhaphazele igazi ealtareni inxa zonke.

3Uzakuthatha kuwo umhlatshelo womnikelo wokuthula, umnikelo owenzelwe iNkosi ngomlilo, idanga lemibilini, lamahwahwa wonke asemibilinini,

4lezinso zombili lamahwahwa azo angasezinkalweni, lamahwahwa angaphezu kwesibindi ozakuwasusa lezinso.

5Amadodana kaAroni azakukutshisa ealtareni kanye lomnikelo wokutshiswa phezu kwenkuni ezisemlilweni; kungumnikelo owenziwe ngomlilo olephunga elimnandi eNkosini.

6Uba umnikelo wakhe ongumhlatshelo womnikelo wokuthula eNkosini ungowemihlambi, enduna ingabe ensikazi, kanikele ngawo ungelasici.

7Uba enikela ngemvu, ibe ngumnikelo wakhe, kayinikele phambi kweNkosi,

8abeke isandla sakhe enhlokweni yomnikelo wakhe, awuhlabe ngaphambi kwethente lokuhlangana; amadodana kaAroni akhaphazele igazi lawo ealtareni inxa zonke.

9Uzakuthatha kuwo umhlatshelo womnikelo wokuthula, umnikelo owenzelwe iNkosi ngomlilo, amahwahwa awo, lomsila wonke ononileyo ewuquma eduze lomgogodla, ledanga lemibilini, lamahwahwa wonke asemibilinini,

10lezinso zombili lamahwahwa azo angasezinkalweni, lamahwahwa angaphezu kwesibindi ozakuwasusa lezinso.

11Umpristi uzakukutshisa ealtareni kube yikudla, kube ngumnikelo owenzelwe iNkosi ngomlilo.

12Uba umnikelo wakhe uyimbuzi, kayinikele phambi kweNkosi,

13abeke isandla sakhe enhlokweni yayo, ayihlabe ngaphambi kwethente lokuhlangana; amadodana kaAroni akhaphazele igazi layo ealtareni inxa zonke.

14Uzakuthatha kiyo, anikele umnikelo owenzelwe iNkosi ngomlilo, idanga lemibilini, lamahwahwa wonke asemibilinini,

15lezinso zombili lamahwahwa azo angasezinkalweni, lamahwahwa angaphezu kwesibindi azakuwasusa lezinso.

16Umpristi uzakukutshisa ealtareni kube yikudla, kube ngumnikelo owenziwe ngomlilo olephunga elimnandi. Wonke amahwahwa ngaweNkosi.

17Lokhu kuzakuba yisimiso esingelakuphela ezizukulwaneni zenu zonke, emizini yenu yonke, sokuthi lingadli amahwahwa legazi.