Josh 11 - Ndebele Bible (iBhayibhili Elingcwele) 1978

UJoshuwa unqoba lonke ilizwe

1Kwathi lapho uJabini inkosi yaseHazori ekuzwa lokho, wathumela ilizwi kuJobabi inkosi yaseMadoni, lasenkosini yaseShimironi, lasenkosini yaseAkishafi,

2lasemakhosini asenyakatho elizweni lamaqaqa, lawasesihotsheni esiseningizimu kweKinerethi, lawaseShefela, lawaselizweni laseDori ngasentshonalanga,

3lakumaKanani ngasempumalanga langasentshonalanga, lakumaAmori lakumaHethi lakumaPerizi lakumaJebusi asezintabeni, lakumaHivi ngaphansi kweHermoni elizweni laseMizipa.

4Aphuma wona lawo wonke amabutho awo eyimpi enkulu, ubunengi bawo bungangetshebetshebe elisokhunjini lolwandle, kanye lamabhiza amanengi lenqola zokulwa ezinengi.

5Wonke lamakhosi ahlanganisa amabutho awo, eza amisa ngasemanzini aseMeroma, ukuba alwe loIsrayeli.

6INkosi yathi kuJoshuwa: Ungabesabi, ngoba kusasa ngalesisikhathi ngizabanikela sebefile kuIsrayeli; uzaquma imisipha yamabhiza abo, utshise ngomlilo inqola zabo zokulwa.

7UJoshuwa labo bonke abantu bakhe bempi babajuma ngasemanzini aseMeroma, babahlasela.

8INkosi yabanikela esandleni sikaIsrayeli owabahlasela waxotshana labo kwaze kwaba seSidoni elikhulu laseMisirefothi‐Mayimi, langasempumalanga kwaze kwaba sesihotsheni seMizipe. Babachitha, kakwaze kwasala loyedwa.

9UJoshuwa wenza kibo njengokutsho kweNkosi; waquma imisipha yamabhiza abo, watshisa ngomlilo inqola zabo zokulwa.

10UJoshuwa wasebuya ngalesosikhathi, wathumba iHazori, wabulala inkosi yalo. Kuqala iHazori lalilamandla kulayo yonke leyomibuso.

11Babulala ngomkhonto bonke ababekilo, babaqeda nya; kabatshiyanga lokukodwa okuphilayo, batshisa iHazori ngomlilo.

12Yonke imizi yalawomakhosi kanye lamakhosi ayo uJoshuwa wayithumba, wayichitha ngomkhonto, wayiqeda nya, njengokulaya kukaMose inceku yeNkosi.

13Kodwa imizi yonke eyayisemadundulwini uIsrayeli kayitshisanga ngaphandle kweHazori kuphela uJoshuwa alitshisayo.

14AbakoIsrayeli bathatha yonke impahla yalimizi lenkomo, kwaba yimpango yabo. Kodwa bonke abantu bababulala baze babaqeda nya, kabatshiyanga lokukodwa okuphilayo.

15Njengalokhu iNkosi yayimlayile uMose inceku yayo, ngakho uMose wamlaya uJoshuwa. UJoshuwa wenza njalo; kakulalutho angalwenzanga kukho iNkosi eyakulaya uMose.

16Ngakho uJoshuwa walinqoba lonke lelolizwe elasemaqaqeni, lalo lonke iNegebi, lelizwe lonke laseGosheni leShefela, leAraba, lelamaqaqa lonke lakoIsrayeli lezigodi zalo,

17kusukela entabeni elugwadule kusiya eSeyiri kuze kube seBali‐Gadi esihotsheni saseLebanoni ngaphansi kwentaba yaseHermoni. Wawathumba wonke amakhosi abo, wawachitha wawabulala.

18UJoshuwa walwa isikhathi eside lalawomakhosi.

19Kakubanga lamuzi owenza isivumelwano sokuthula labakoIsrayeli ngaphandle kwamaHivi ayakhe eGibeyoni; bayithumba yonke ngokulwa.

20Ngoba kwakuyiNkosi eyenza inhliziyo zabo zaba lukhuni ukuze balwe loIsrayeli, bachithwe baphele, bangahawukelwa kodwa babhujiswe, njengokulaya kweNkosi kuMose.

21UJoshuwa wasuka ngalesosikhathi, wachitha amaAnaki ngasezintabeni, eHebroni leDebiri leAnabi lasezintabeni zakoJuda, lakuzo zonke ezakoIsrayeli; uJoshuwa wawaqothula kanye lemizi yawo.

22Kakusalanga lelilodwa iAnaki elizweni labantu bakoIsrayeli, kuseGaza kuphela leGathi leAshidodi lapho kwasala amanye khona.

23UJoshuwa walithumba ilizwe lonke njengakho konke iNkosi eyakukhuluma kuMose. UJoshuwa wabanika abakoIsrayeli ilizwe ngezizwe zabo, laba ngelabo. Ilizwe laseliphumulake ekulweni.