uMika 7 - Ndebele Bible (iBhayibhili Elingcwele) 1978

Izono zikaIsrayeli

1Maye mina! ngoba senginjengokuvunwa kwezithelo zasehlobo,

njengevini eselivunwe laphela;

kakuselahlukuzo lokudliwa, lemikhiwa yokuqala engiyithandayo.

2Abalungileyo babhubhile emhlabeni,

kakusekho oqotho phakathi kwabantu;

bonke bacathamela ukuchitha igazi,

lowo lalowo uzingela umfowabo ngembule.

3Izandla zabo zikhuthalele ukwenza okubi,

isikhulu lomahluleli bathengwa ngemali,

loyisikhulu wahlulela ngokuthanda kwakhe,

kuhlanekelwe ukulunga.

4Omuhle wabo unjengameva,

lolungileyo wabo unjengothango lwameva.

Usuku lokutshaywa kwabo, abatshumayela ngalo abalindi babo, selufikile,

lokudideka kwabo sekusondele.

5Ungamthembi umakhelwana, ungamkholwa umngane;

umvalele umlomo umkakho olala lawe.

6Indodana iyadelela uyise, lendodakazi ivukela unina,

umalokazana uvukela uninazala,

lezitha zomuntu zingamadoda endlu yakhe.INkosi izakuletha ukukhanya lokukhululwa

7Kodwa mina ngizalindela iNkosi,

ngilindele uNkulunkulu wokusiliswa kwami;

uNkulunkulu wami uzakungizwa.

8Ungathokozi ngami, sitha sami,

ngoba lapho ngisiwa, ngizakuvuka;

lapho ngihlezi emnyameni, iNkosi izakuba yikukhanya kwami.

9Ngizathwala intukuthelo yeNkosi,

ngoba ngonile kuyo,

ize imele indaba yami, ingenzele ukulunga.

Izakungikhuphela ekukhanyeni, ngibone ukukhululwa kwayo.

10Isitha sami sizakukubona, zimbambe inhloni yena owathi kimi:

Ingaphi iNkosi uNkulunkulu wakho na?

Ngizathokoza nxa ngimbona esenyathelwe phansi njengodaka lwendlela.

11Kuzakufika usuku lokwakhiwa kwemiduli yakho;

ngalolosuku imingcele yakho izadediselwa khatshana.

12Ngalolosuku bazafika kuwe bevela eAsiriya laseGibithe,

kusukela eGibithe kuze kube semfuleni iYufrathi,

bevela kuzo zonke inlwandle lezintaba.

13Kodwa ilizwe lizachitheka ngenxa yobubi babakhileyo kilo.

Isihawu seNkosi kuIsrayeli

14Yelusa abantu bakho ngentonga yakho,

umhlambi ongowakho impela ohlala wodwa ehlathini lasezihotsheni;

kawalukele eBashani laseGileyadi njengasendulo.

15Sitshengise izimangaliso njengensukwini zokuphuma kwakho eGibithe.

16Izizwe zizabona, zibe lenhloni lanxa zilamandla,

zibambe imilomo yazo, lendlebe zazo zibe yizacuthe,

17Zizahuba ngesisu othulini njengenyoka, lanjengezinto ezihahabayo zomhlaba;

zizaphuma enqabeni zazo zithuthumela,

ziphendukele eNkosini uNkulunkulu wethu ngokwesaba,

zitshaywe luvalo ngenxa yakho.

18Ngubani uNkulunkulu onjengawe, othethelela isono sabantu bakhe abaseleyo

ayekele isiphambeko sabo na?

Kathukutheli kokuphela, ngoba uthokoza ngothando olungapheliyo.

19Uzasihawukela futhi, anyathele phansi ububi bethu.

Wena uzaphosela enzikini yolwandle izono zethu zonke;

20uzanika uJakobe ukuthembeka, lenzalo kaAbrahama uthando olungapheliyo,

njengokufunga kwakho kubo endulo.