Levi 6 - Ndebele Bible (iBhayibhili Elingcwele) 1978

1INkosi yathi kuMose:Nani 5:5–8

2Uba umuntu esona, esenza isiphambeko eNkosini ngokukhohlisa umakhelwana wakhe mayelana lalokho okunikezwa kuye ukuba akulondoloze, loba mayelana lesibambiso, loba ephanga umakhelwane wakhe loba emcindezela,

3ingabe efumana lokho obekulahlekile, akuphike, aqambe amanga ngakho — ngitsho kwenye yalezozinto umuntu ayenzayo, one ngayo —

4kuzakuthi nxa esenza njalo, abe lecala, uzabuyisa lokho akuphangileyo, loba lokho owakuzuza ngokucindezela, loba lokho okwanikezwa kuye ukuba akulondoloze, loba lokho obekulahlekile akufumeneyo,

5ingabe okunye akhulume amanga ngakho; kakubuyise konke, engezelele okwesihlanu kukho, amnike lowomuntu okungokwakhe ngosuku avuma ngalo icala lakhe.

6Kalethe eNkosini umnikelo wakhe wecala, athathe emhlambini inqama engelasici, elentengo elingana lentengo yomnikelo wecala, ayise kumpristi,

7umpristi amenzele indlela yokubuyisana phambi kweNkosi, athethelelwe konke akwenzileyo waba lecala ngakho.

Eminye imilayo ngeminikelo

8INkosi yathi kuMose:

9Laya uAroni lamadodana akhe uthi: Nanku umlayo womnikelo wokutshiswa. Umnikelo wokutshiswa uzakuhlala eziko lealtare ubusuku bonke kuze kuse, lomlilo wealtare uvuthe njalo phezu kwalo.

10Umpristi uzakugqoka isambatho sakhe selembu elihle, lebhulugwe lakhe lelembu elihle, athathe umlotha womnikelo wokutshiswa otshiswe ngumlilo ealtareni, awubeke ngasealtareni.

11Abesekhumula izambatho zakhe, embathe ezinye izambatho, akhuphele umlotha ngaphandle kwezihonqo endaweni ehlambulukileyo.

12Umlilo ophezu kwealtare uzakuvutha njalo, ungacimi; zonke insuku ekuseni umpristi uzakuwukhwezela afake inkuni, abeke kuhle umnikelo wokutshiswa phezu kwealtare, atshise kulo amahwahwa eminikelo yokuthula.

13Umlilo uzakuvutha ealtareni kokuphela, ungacimi.

14Nanku umlayo womnikelo wempuphu. Amadodana kaAroni azakuwunikela phambi kweNkosi, ngaphambi kwealtare.

15Kakucutshwe impuphu ecolekileyo yomnikelo wempuphu, lamafutha awo kanye lenhlaka yonke ephezu komnikelo wempuphu, kutshiswe ealtareni kube yisikhumbuzo lephunga elimnandi eNkosini.

16Okuseleyo kuwo uAroni lamadodana akhe bazakukudla, bakudle njengezinkwa ezingelamvubelo endaweni engcwele, egumeni lethente lokuhlangana.

17Kakuyikufakwa imvubelo. Ngikunike kube yisabelo sabo seminikelo yami eyenziwe ngomlilo; kuyinto engcwele kakhulu, njengomnikelo wesono lomnikelo wecala.

18Bonke abantwana besilisa bakaAroni bangakudla, ngoba kuyisabelo sabo kokuphela ezizukulwaneni zenu esivela eminikelweni eyenzelwe iNkosi ngomlilo; bonke abakuthintayo bazakuba ngcwele.

19INkosi yathi kuMose:

20Lo ngumnikelo uAroni lamadodana akhe abazakuwunikela eNkosini ngosuku lokugcotshwa kwakhe; kabanikele ngengxenye yehefa lempuphu ecolekileyo ibe ngumnikelo wempuphu wensuku zonke, banikele ingxenye yayo ekuseni lengxenye kusihlwa.

21Uzakulungiselwa emganwini wensimbi ngamafutha. Uwulethe usuxutshanisiwe kuhle, ube ngumnikelo wempuphu onikelwa ngencezu eziphekiweyo, zibe liphunga elimnandi eNkosini.

22Umpristi oyindodana kaAroni, ogcotshiweyo ukuba athathe isikhundla sakhe, uzakuwunikela eNkosini; lokhu kuyisimiso esingelakuphela. Lumnikelo wonke uzakutshiselwa iNkosi.

23Yonke iminikelo yempuphu yompristi izakutshiswa, ingadliwa.

24INkosi yathi kuMose:

25Tshono kuAroni lamadodana akhe uthi: Nanku umlayo womnikelo wesono. Umnikelo wesono uzakuhlatshwa phambi kweNkosi endaweni lapho kuhlatshelwa khona umnikelo wokutshiswa; ungcwele kakhulu.

26Umpristi owunikelela isono uzakuwudla; udlelwe endaweni engcwele, egumeni lethente lokuhlangana.

27Konke okuthinta inyama yawo kuzakuba ngcwele; nxa igazi lawo lichaphakela esigqokweni, gezisela lesosigqoko endaweni engcwele.

28Imbiza yebumba esigeziswe kuyo ngamanzi abilayo kayibulawe; kodwa uba sigeziswa embizeni yethusi, kayiphalwe, ihlanzwe ngamanzi.

29Bonke abapristi besilisa bangawudla, ungcwele kakhulu.

30Kodwa kakungadliwa umnikelo wesono okungeniswa igazi lawo ethenteni lokuhlangana ukuba kwenziwe ukubuyisana endaweni engcwele; kawutshiswe ngomlilo.