Isa 25 - Ndebele Bible (iBhayibhili Elingcwele) 1978

Ingoma yokubonga iNkosi ngezenzo zayo

1Wena Nkosi unguNkulunkulu wami;

ngizakukudumisa, ngidumise ibizo lakho;

ngoba wenzile izinto ezimangalisayo,

lamacebo akho amiswa endulo, athembekile, aqotho.

2Wenzile imizi yaba ngamanxiwa,

imizi evikelweyo yaba zindonga;

izigodlo zabezizwe kazisekho,

kazisayikwakhiwa futhi.

3Ngakho abantu abalamandla bazakukudumisa,

lemizi yezizwe ezilolunya ikwesabe.

4Impela ubuyinqaba yabayanga,

inqaba yohluphekayo osizini lwakhe,

isiphephelo esivunguzaneni, lomthunzi ekubaleleni.

Umoya wabalolunya unjengesivunguzane ebusika,

5unjengokubalela endaweni eyomileyo.

Wena uyawahlula umsindo wabezizwe;

njengokubalela kuqedwa ngumthunzi weyezi,

ngokunjalo ingoma yabalolunya izathuliswa.

6Kulintaba iZiyone iNkosi yamabandla izakwenzela abantu bonke idili elilokudla okumnandi, idili elilewayini elihle elicengekileyo, lelilezibondlo ezimnandi.

7Izakususa kulintaba isimbombozo sokulila esembese bonke abantu, leveli eligubuzele izizwe zonke.

8Izakuqeda ukufa kokuphela. INkosi uNkulunkulu izakwesula inyembezi emehlweni wonke, isuse lehlazo labantu bayo emhlabeni wonke; ngoba iNkosi ikhulumile.

9Kuzakuthiwa ngalolosuku: Khangela, lo nguNkulunkulu wethu ebesimlindele ukuba asikhulule. Le yiNkosi ebesiyilindele; asithabe, sithokoze ngokusikhulula kwayo.

10Ngoba isandla seNkosi sizavikela lintaba, kodwa uMowabi uzanyathezelwa phansi endaweni yakhe, njengezibi ezinyathelwa egodini lomquba.Isa 15:1—16:14; Jer 48:1–47; Hez 25:8–11; Amos 2:1–3; Zef 2:8–11

11Uzakwelula izandla zakhe phakathi kwalo njengomuntu ontshezayo eselulela izandla zakhe ukuba antsheze; kodwa iNkosi izachitha ukuzikhukhumeza kwakhe, kanye lemisebenzi yezandla zakhe.

12Imiduli yakhe emide yezinqaba iNkosi izayidilizela phansi, iyiphosele emhlabathini lasothulini.