1Kwathi uRehobowamu eselamandla, lombuso wakhe usuqinile, wawudela umlayo weNkosi, labo bonke abakoIsrayeli benza njalo.
2Ngomnyaka wesihlanu wokubusa kwakhe, ngoba bonile eNkosini, uShishaki inkosi yaseGibithe wafika ukuhlasela iJerusalema,
3elezinqola zokulwa ezingamakhulu alitshumi lambili labagadi bamabhiza abazinkulungwane ezingamatshumi ayisithupha. Wafika labantu abanengi abangelakubalwa abaseLibiya lamaSikhi lamaEtiyopiya.
4Wayithumba imizi ebiyelweyo yakoJuda waze wafika eJerusalema.
5UShemaya umprofethi wafika kuRehobowamu lakuzikhulu zakoJuda ezazibuthene eJerusalema ngenxa kaShishaki, wathi kubo: INkosi uNkulunkulu ithi: Lingilahlile lina, lami sengililahlela esandleni sikaShishaki.
6Izikhulu zakoIsrayeli kanye lenkosi bazithoba bathi: INkosi ilungile.
7Lapho iNkosi isibona ukuba bazithobile, ilizwi layo lafika kuShemaya lathi: Bazithobile; kangiyikubabhubhisa, kodwa ngizabakhulula emva kwesikhatshana, lolaka lwami kaluyikwehliselwa eJerusalema ngesandla sikaShishaki.
8Kodwa bazakuba zinceku zakhe ukuze bazi umahluko phakathi kokungikhonza mina lokukhonza amakhosi amanye amazwe.
9Ngakho uShishaki inkosi yaseGibithe yahlasela iJerusalema, yathumba inotho yethempeli lenotho yesigodlo senkosi, yakuthatha konke; yathatha lezihlangu zegolide uSolomoni ayezenzile.1 Kho 10:16, 17; 2 Lan 9:15, 16
10Inkosi uRehobowamu yenza endaweni yazo izihlangu zethusi, yazinikeza ezinduneni zabalindi ababelinda umnyango wesigodlo senkosi.
11Izikhathi zonke zokuya kwenkosi ethempelini abalindi babeziletha khona, babuye bazibuyisele endlini yabalindi.
12Isizithobile, ulaka lweNkosi uNkulunkulu lwadeda kuyo ukuze ingayibhubhisi; futhi izinto zasezilungile koJuda.
13Inkosi uRehobowamu yaqinisa amandla ayo eJerusalema, yaqhubeka ibusa. Yayisileminyaka engamatshumi amane lanye lapho iqalisa ukubusa, yabusa iminyaka elitshumi lesikhombisa eJerusalema, umuzi iNkosi uNkulunkulu eyayiwukhethile phakathi kwazo zonke izizwe zakoIsrayeli ukuba ibizo layo lidunyiselwe khona. Ibizo likanina lalinguNahama umAmoni.
14URehobowamu wenza okubi ngokungazimiseli ngenhliziyo yakhe ukuyidinga iNkosi.
15Indaba zikaRehobowamu, kusukela ekuqaleni kuze kube sekucineni, zilotshiwe ogwalweni lwezindaba zomprofethi uShemaya lezikaIdo umboni. Kwakuhlala kusiba khona ukulwa phakathi kukaRehobowamu loJerobowamu.
16URehobowamu waya kwabaphansi, wangcwatshelwa emzini kaDavida. UAbija indodana yakhe waba yinkosi esikhundleni sakhe.
Who We AreWhat We EelieveWhat We Do
2025 by iamachristian.org,Inc All rights reserved.
