Jobe 6 - Ndebele Bible (iBhayibhili Elingcwele) 1978

Impendulo kaJobe: usola abangane bakhe

1UJobe wasephendula esithi:

2Kungathi ukucaphuka kwami kungalinganiswa,

lakho konke ukuhlupheka kwami kufakwe ezilinganisweni!

3Ngoba kungaba nzima ukwedlula itshebetshebe lolwandle.

Ngakhoke amazwi ami aseyikubhuda.

4Imitshoko kaSomandla ingihlabile;

umoya wami uyanatha ubuhlungu bayo;

okwesabisayo kukaNkulunkulu kuyangehlela.

5Ubabhemi weganga uyakhala yini nxa elotshani,

lenkabi iyakhonya yini ekudleni kwayo na?

6Kambe okuduma kungadliwa kungelatshwayi na?

Kulokuhlabusa kokumhlophe kweqanda na?

7Umoya wami uyala ukukuthinta,

kunjengokudla okunengekayo kimi.

8Kungathi isicelo sami singenziwa,

uNkulunkulu anginike engikufisayo,

9kumthokozise uNkulunkulu ukungichoboza,

elule isandla sakhe angiqede.

10Lokhu kungaba yinduduzo kimi,

ngingajabula ebuhlungwini bami obungakhawuliyo;

ngoba kangiwaphikanga amazwi oNgcwele.

11Ayini amandla ami ukuba ngilinde na?

Ukuphela kwami kuyini ukuba ngibekezele na?

12Amandla ami angamandla amatshe yini,

lenyama yami ilithusi na?

13Kambe kukhona amandla kimi na?

Konke okusizayo kakungitshiyanga na?

14Abangane bomuntu bafanele ukumhawukela

lapho elahlekelwa lithemba kuSomandla.

15Abafowethu kabathembekanga njengomfula ogelezayo,

njengezifula ezitshayo,

16ezimnyama ngeliqhwa,

lapho sezigcwele ungqoqwane.

17Kodwa ngesikhathi sokutshisa amanzi ayanyamalala,

atshe lapho selibalele.

18Indwendwe ezihambayo, ziyaphambuka,

zingene enkangala zibhubhe.

19Indwendwe zaseTema zidinga kuzo amanzi,

lezihambi zaseSheba zithembela kuzo;

20zidane ngoba bezithembile,

zifike kuzo zidideke.

21Linjaloke lani kimi,

liyabona ukuhlupheka kwami, liyesaba.

22Kambe ngake ngatsho yini ukuthi:

Ngiphani lokhu kumbe lokhuyana,

livule imixhaka yenu lisize ukuphila kwami na?

23Lokuthi: Ngikhululani ezitheni zami,

lingihlenge ezandleni zabacindezeli bami na?

24Ngifundisani, ng’khona ngizathula;

lingitshengise lapho ngiduhe khona.

25Ukukhuluma okuqotho kulamandla;

kodwa ukusolwa yini kusizani na?

26Lithi lingasola amazwi na?

Ngoba ukukhuluma komuntu ophelelwe lithemba kungumoya nje.

27Lizakwenza inkatho ngentandane,

lithengise umngane wenu na?

28Khathesi, ake lingikhangele,

ngoba kangiyikuqamba amanga kini.

29Ake liyekele, kungabi khona okungaqondanga.

Yekelani bo, indaba yami ilungile.

30Kambe kukhona okungaqondanga olimini lwami na?

Kangikwazi yini okubi na?