Hubo 109 - Ndebele Bible (iBhayibhili Elingcwele) 1978

Umkhulelo wokucela impindiselo

1Ungathuli, Nkulunkulu engikubongayo.

2Ngoba ababi labakhohlisayo bakhuluma ngami,

bengiqambela amanga.

3Bangihanqa ngamazwi enzondo,

bengihlasela ngingelacala.

4Ngithi lapho ngibathanda bona bangizonde,

lalapho ngibakhulekela.

5Ngakho bangibuyisela okubi ngokuhle,

lenzondo ngothando lwami.

6Umvusele lowo ozakumfumana elecala

omelana laye ammangalele.

7Ekuthonisisweni kwakhe kalahlwe licala;

lomkhuleko wakhe ube yisono;

8insuku zakhe zibe lutshwana,

omunye athathe isikhundla sakhe.

9Abantwana bakhe kababe yizintandane,

lomkakhe abe ngumfelwakazi.

10Abantwana bakhe kabazulazule bephanza,

baxotshwe emanxiweni abahlala kuwo.

11Labo aboleka kibo bamthathele konke alakho,

labezizweni baphange izithelo zomsebenzi wakhe,

12kungabi khona omenzela umusa,

futhi kungabi khona ozwela abantwana bakhe isihawu.

13Inzalo yakhe kayiphele,

lebizo lakhe lesulwe esizukulwaneni esilandelayo.

14Ububi babokhokho bakhe bukhunjulwe phambi kweNkosi,

kuthi isono sikanina singasuswa.

15Kabube phambi kweNkosi kokuphela;

kakuphele ukukhunjulwa kwakhe emhlabeni;

16ngoba wayengakhumbuli ukwenza umusa,

kodwa wazingela umuntu ohluphekayo longumyanga

lodabukileyo enhliziyweni ukubabulala.

17Wathanda ukuthuka; ukuthuka kakwehlele phezu kwakhe;

wayengathandi ukubusisa; ngakho kakuhlale khatshana laye.

18Wagqoka ukuthuka njengesigqoko;

kakuzike emzimbeni wakhe njengamanzi

lanjengamafutha emathanjeni akhe;

19kakube njengengubo azembesa ngayo,

kube njengebhanti azibopha ngalo insuku zonke.

20Lokhu kakube ngumvuzo wezitha zami ovela eNkosini,

lowalabo abakhuluma okubi ngami.

21Kodwa wena, Nkulunkulu, Nkosi yami,

ngenzela mina ngokwebizo lakho;

ngoba uthando lwakho olungapheliyo luhle, akungikhulule.

22Ngoba ngiyisihlupheki lomyanga,

lenhliziyo yami idabukile phakathi kwami.

23Ngiyedlula njengethunzi lakusihlwa;

ngiphephuke njengesikhongwane.

24Amadolo ami abuthakathaka ngokuzila ukudla,

lomzimba wami usucakile.

25Sengiyinhlekisa kubo abayizitha zami,

lapho bengibona banikina amakhanda abo.

26Akungisize, Nkosi, Nkulunkulu wami,

ungikhulule ngothando lwakho olungapheliyo,

27ukuze bazi ukuthi lokhu kuvela kuwe;

wena, Nkosi, ukwenzile.

28Kabathuke bona, kodwa wena ubusise;

kabayangeke abangivukelayo,

kodwa inceku yakho kayithabe.

29Kabathelwe lihlazo abangivukelayo,

bembeswe zinhloni njengengubo.

30Ngizakuyibonga kakhulu iNkosi ngomlomo wami;

ngizakuyidumisa phakathi kwexuku.

31Ngoba iyamela umyanga,

ukuba imkhulule kulabo abamqumela ukufa.