Isa 43 - Ndebele Bible (iBhayibhili Elingcwele) 1978

Ukuhlengwa kukaIsrayeli

1Kodwa khathesi iNkosi itsho ngokunje,

yona eyakubumbayo wena Jakobe,

eyakwenzayo wena Israyeli,

ithi: Ungesabi, ngoba ngikuhlengile,

ngakubiza ngebizo lakho, ungowami.

2Lapho udabula emanzini ngizakuba lawe;

lalapho udabula emifuleni, kayiyikukukhukhula;

lalapho uhamba emlilweni, kawuyikutsha,

lelangabi kaliyikukutshisa.

3Ngoba mina ngiyiNkosi uNkulunkulu wakho,

oNgcwele kaIsrayeli, uMsilisi wakho.

Ngizanika iGibithe libe lihlawulo lakho,

loEtiyopiya leSeba esikhundleni sakho.

4Ngoba wena uligugu emehlweni ami,

udumile, ngiyakuthanda.

Ngiyanika abantu esikhundleni sakho,

lezizwe endaweni yokuphila kwakhe.

5Ungesabi, ngoba mina ngilawe;

ngizakhupha inzalo yakho ngasempumalanga,

ngikubuthe langasentshonalanga;

6ngitsho lakuyo inyakatho ngithi: Bakhulule;

lakuyo iningizimu ngithi: Ungabaleli;

buyisani amadodana ami akhatshana,

lamadodakazi ami ezindaweni zonke,

7bonke ababizwa ngebizo lami,

bonke engabadalayo ngabenza,

engabenzela udumo lwami.

8Lethani abantu bami abayiziphofu bona belamehlo,

labayizacuthe bona belezindlebe.

9Kazibuthane ndawonye izizwe zonke,

labantu bonke bahlangane.

Ngubani phakathi kwabonkulunkulu ongamemezela lokhu,

owasibikezela lokhu okwenzakayo na?

Kabalethe ofakazi babo ukubafakazela,

bezwe bathi: Kuliqiniso.

10Lina bakoIsrayeli, lingofakazi bami, kutsho iNkosi,

lenceku yami engiyikhethileyo,

ukuze lazi, likholwe, liqedisise ukuba nginguye.

Ngaphambi kwami kakuzanga kube khona omunye unkulunkulu,

langasemva kwami kakuyikuba khona omunye.

11Mina ngiyiNkosi,

ngaphandle kwami kakho umsilisi.

12Yimi engakubikezela, ngakumemezela,

ngeza ukulisiza,

kwakungesuye unkulunkulu wezizwe phakathi kwenu;

lina lingofakazi bami, kutsho iNkosi.

13Mina nginguNkulunkulu;

yebo, ngizaba nguye lanini.

Kakho ongakhululwa esandleni sami;

kakho ongaphendula engikwenzayo.

14INkosi, uMhlengi wenu, oNgcwele kaIsrayeli, ithi:

Ngenxa yenu ngizathumela impi eBabiloni,

ngaphule yonke imigoqo yamasango omuzi,

kuthi ukuthokoza kwamaKaladiya kuphenduke kube yisililo.

15Mina ngiyiNkosi, oNgcwele wenu,

uMdali kaIsrayeli, inkosi yenu.

16INkosi eyenza umgwaqo olwandle lendlela emanzini alamandla,

17eyaholela impi elamandla ekuchithekeni,

impi yezinqola zokulwa lamabhiza,

okwawa kwalala phansi, kakwabe kusavuka,

kwacima njengelangabi lomlilo,

18ithi: Lingakhumbuli izinto zakuqala,

linganakani ngezinto zendulo,

19ngoba, khangelani, ngenza okutsha,

kuyavela khathesi, angithi liyakubona na?

Ngizakwenza indlela enkangala,

lemifula endaweni elugwadule.

20Inyamazana zeganga zizangidumisa,

amakhanka lezintshe;

ngoba ngiveza amanzi enkangala, lemifula endaweni elugwadule,

ukunathisa abantu bami abakhethiweyo,

21abantu engazenzela bona ukuba batshumayele udumo lwami.

22Kanti kawukhulekanga kimi, wena Jakobe;

udiniwe ngami, wena Israyeli.

23Kawulethanga kimi izimvu zakho zibe ngumnikelo wokutshiswa,

kawungidumisanga ngemihlatshelo yakho.

Kangikudubanga ngokufuna iminikelo,

kangikudinisanga langokufuna impepha.

24Kawungithengelanga impepha,

kawungisuthisanga ngamahwahwa emihlatshelo yakho.

Kodwa ungikhathazile ngezono zakho,

wangidinisa ngeziphambeko zakho.

25Mina nginguye owesula iziphambeko zakho ngenxa yami;

kangisayikuzikhumbula lezono zakho.

26Ake ungimangalele, asiphikisane;

landisa indaba yakho ukuze kuthiwe uqondile.

27Ukhokho wokuqala wona,

labakhulumeli bakho bonile kimi,

28izikhulu zakho zangcolisa indlu yami engcwele;

ngakhoke nganikela uJakobe ekubhujisweni, loIsrayeli ekuthukweni.