Zek 1 - Ndebele Bible (iBhayibhili Elingcwele) 1978

Abantu balaywa ukuphenduka ezonweni zabo

1Ngenyanga yesificaminwembili, ngomnyaka wesibili kaDariyu, ilizwi leNkosi lafika kuZekariya umprofethi, indodana kaBerekiya kaIdo, lisithi:Ezra 4:24—5:1; 6:14

2INkosi yabathukuthelela okhokho benu.

3Ngakhoke tshono ebantwini uthi: INkosi yamabandla ithi: Buyelani kimi, lami ngizabuyela kini, kutsho iNkosi yamabandla.

4Lingabi njengokhokho benu abaprofethi bakuqala abamemeza kibo besithi: INkosi yamabandla ithi: Phendukani ezindleleni zenu ezimbi lasezenzweni zenu ezimbi. Kodwa kabezwanga, kabanginanzanga, kutsho iNkosi.

5Okhokho benu bangaphi na? Labaprofethi baphila kokuphela na?

6Kodwa amazwi ami lezimiso zami, engalaya ngakho inceku zami abaprofethi, kakubaficanga okhokho benu na? Ngakho baphenduka bathi: Njengalokhu iNkosi yamabandla yazimisela ukusiphatha ngokufanele indlela zethu lezenzo zethu, yenze njalo.

Umbono womprofethi ngamabhiza

7Ngosuku lwamatshumi amabili lane lwenyanga yetshumi lanye ethiwa nguShebati, ngomnyaka wesibili kaDariyu, ilizwi leNkosi lafika kuZekariya umprofethi, indodana kaBerekiya kaIdo. UZekariya wathi:

8Ngabona ebusuku umuntu ogade ibhiza elibomvu. Wayemi phakathi kwezihlahla zomtshekisane esigodini, kukhona emva kwakhe amabhiza abomvu lalubhidi lamhlophe.Isam 6:2

9Ngasengisithi: Kutshoni lokhu, Nkosi na? Isithunywa esasikhuluma lami sathi kimi: Ngizakukutshengisa ukuthi kuyini.

10Ngakhoke lowomuntu owayemi phakathi kwezihlahla zomtshekisane waphendula wathi: Laba yibo iNkosi ebathumileyo ukuhlola umhlaba.

11Bona basebesiphendula isithunya seNkosi esasimi phakathi kwezihlahla zomtshekisane, bathi: Sesiwuhlolile umhlaba, sabona ukuba umhlaba wonke uhlezi kuhle.

12Isithunywa seNkosi sasesisithi: Nkosi yamabandla, koze kube nini ungabanga lasihawu kilo iJerusalema lakuyo imizi yakoJuda, oyithukutheleleyo okweminyaka engamatshumi ayisikhombisa na?

13INkosi yasiphendula isithunywa esasikhuluma lami ngamazwi omusa laduduzayo.

14Ngakho isithunywa esasikhuluma lami sathi kimi: Memeza uthi iNkosi yamabandla ithi: Ngilobukhwele obukhulu ngeJerusalema langeZiyone.

15Ngithukuthele kakhulu ngezizwe ezichelesileyo, ngoba ngathi ngisazondile kancinyane, zandisa ububi.

16Ngalokhoke, kutsho iNkosi, sengibuyile eJerusalema ngilesihawu; indlu yami izakwakhiwa kulo, kutsho iNkosi yamabandla, lentambo yokulinganisa izatshonjululwa phezu kweJerusalema.

17Memeza futhi uthi iNkosi yamabandla ithi: Imizi yami izagcwala iphuphume futhi izinto ezinhle. INkosi izaduduza futhi iZiyone, ibuye ilikhethe iJerusalema.

Umbono womprofethi ngezimpondo ezine labakhandi

18Ngaphakamisa amehlo ami, ngabona impondo ezine.

19Ngathi kuso isithunywa esasikhuluma lami: Kuyini lokhu na? Sangiphendula sathi: Lezi zimpondo ezachithachitha uJuda loIsrayeli leJerusalema.

20INkosi yasingitshengisa abakhandi abane.

21Ngasengisithi: Laba bazekwenzani na? Yangiphendula yathi: Leziya impondo zachithachitha uJuda, kwaze kwasweleka loyedwa ongaphakamisa ikhanda. Lababakhandi bezile ukwesabisa izizwe, lokwephula impondo zezizwe ezaphakamisela impondo zazo ilizwe lakoJuda ukulichithachitha.