Hubo 18 - Ndebele Bible (iBhayibhili Elingcwele) 1978

Ihubo likaDavida lokubonga uNkulunkulu ngokukhululwa

1Ngiyakuthanda, Nkosi, mandla ami.

2INkosi ilidwala lami, lenqaba yami, lomkhululi wami;

uNkulunkulu wami ulidwala lami engiphephela kulo,

lesihlangu sami, lesivikelo sami lenqaba yami.

3Ngizakhuleka eNkosini efanele ukudunyiswa,

ngikhululwe ezitheni zami.

4Izibopho zokufa zangizingelezela,

lezikhukhula zokubhujiswa zangethusa.

5Izibopho zendawo yabafileyo zangithandela,

lemijibila yokufa yangivimbela.

6Ekuhluphekeni kwami ngakhuleka eNkosini,

ngakhala kuNkulunkulu wami;

walizwa ilizwi lami esethempelini lakhe,

ukukhala kwami kwafinyelela endlebeni zakhe.

7Umhlaba wazamazama, wagedezela;

lezisekelo zezintaba zaqhaqhazela, zazamazama,

ngoba wayethukuthele.

8Kwaphuma intuthu emakhaleni akhe,

lomlilo otshisayo emlonyeni wakhe;

amalahle avuthayo aphuma kuye.

9Wadabula amazulu, wehlela phansi,

umnyama omkhulu wawungaphansi kwenyawo zakhe.

10Wakhwela phezu kwekherubi, waphapha,

waphapha ngamaphiko omoya.

11Wenza umnyama waba yisisibekelo sakhe,

wazisitha ngamayezi amnyama agcwele amanzi.

12Ekukhanyeni okuphambi kwakhe

amayezi akhe athela isiqhotho lamalahle omlilo.

13INkosi yakhwaza isemazulwini,

oPhezukonke wazwakalisa ilizwi lakhe.

14Yathuma imitshoko yayo, yabachitha;

yaphazimisa imibane, yabaphaphathekisa.

15Ng’khona kwabonakala itshebetshebe elingaphansi kolwandle,

kwambulwa lezisekelo zomhlaba ekukhwazeni kwakho, Nkosi,

ekufutheni komoya wamakhala akho.

16Yaselula isandla sayo iphezulu, yangibamba,

yangikhupha emanzini amanengi.

17Yangophula esitheni sami esilamandla,

lakibo abangizondayo, ngoba basebengahlule.

18Bangifikela osukwini losizi lwami;

kodwa iNkosi yaba yinsika yami.

19Yangikhuphela endaweni ebanzi,

yangikhulula ngoba ibingithanda.

20INkosi yangipha umvuzo ofanele ukulunga kwami;

yangibuyisela ngokufanele ukuhlambuluka kwezandla zami.

21Ngoba ngizilondolozile indlela zeNkosi,

kangimukanga eNkosini yami ngokubi.

22Ngoba zonke izimiso zayo zaziphambi kwami,

kangiyidelanga imithetho yayo.

23Ngangimsulwa phambi kwayo,

ngibuxwayile ububi.

24Ngakhoke iNkosi ingibuyisele ngokufanele ukulunga kwami,

ngokufanele ukuhlambuluka kwezandla zami phambi kwayo.

25Kothembekileyo wena Nkosi, uyaziveza uthembekile;

kopheleleyo uyaziveza uphelele;

26kohlambulukileyo uyaziveza uhlambulukile;

lakongaqondanga uyaziveza ungaqondanga.

27Ngoba wena uyabakhulula abantu abathobekileyo;

kodwa abantu abazigqajayo uyabehlisela phansi.

28Yebo, wena uyalumathisa isibane sami;

iNkosi, uNkulunkulu wami, iyakhanyisa umnyama wami.

29Ngawe ngingahlula impi;

ngoNkulunkulu ngingeqa umthangala.

30Lo uNkulunkulu indlela yakhe iphelele;

ilizwi leNkosi lithembekile.

Yena uyisihlangu kubo bonke abaphephela kuye.

31Ngoba ngubani onguNkulunkulu ngaphandle kweNkosi na?

Ngubani olidwala ngaphandle kukaNkulunkulu wethu na?

32uNkulunkulu ongambathisa amandla,

owenza indlela yami ibe lula.

33Wenza inyawo zami zibe njengezempala,

wangimisa ezingqongeni,

34ofundisa izandla zami ukulwa,

ukuze ingalo zami zigobise idandili lethusi.

35Wena unginikile isihlangu senkululeko yakho,

lesandla sakho sokunene singisekele,

losizo lwakho lungikhulisile.

36Wenzile zaba banzi izinyathelo zami,

lenyawo zami kazitshelelanga.

37Ngaxotshana lezitha zami, ngazifica,

kangibuyanga ngingakaziqedi.

38Ngazigwaza, zaze zehluleka ukuvuka,

zawa ngaphansi kwenyawo zami.

39Ngoba wena wangambathisa amandla okulwa,

wabawisela phansi abayizitha zami.

40Wazenza zingibalekele izitha zami,

labangizondayo ngababhubhisa.

41Bakhala, kodwa kakubanga khona abasizayo;

bakhala eNkosini, kodwa kayiphendulanga.

42Ngabachola baba njengothuli phambi komoya,

ngabanyathela njengodaka lwendlela.

43Wangikhulula esiphithiphithini sabantu,

wangimisa ngaba yinhloko yezizwe;

abantu engangingabazi bangisebenzela.

44Banela ukungizwa nje ngendaba bangilalela;

abezizweni bazithoba phambi kwami.

45Abezizweni bethuka,

baphuma ezinqabeni zabo bethuthumela.

46INkosi ikhona; kalidunyiswe idwala lami,

kaphakanyiswe uNkulunkulu wokukhululwa kwami;

47uNkulunkulu onginike impindiselo wanginqobela izizwe;

48ongikhulule ezitheni zami;

wena wangiphakamisa phezu kwezitha zami,

wangikhulula ebantwini ababi.

49Ngenxa yalokhu ngizakukubonga phakathi kwezizwe, Nkosi,

ngihubele ibizo lakho.

50Uyanika inkosi yakhe ukunqoba okukhulu,

ebonakalisa uthando lwakhe olungapheliyo kogcotshiweyo wakhe uDavida,

lenzalweni yakhe kuze kube nininini.