Hubo 33 - Ndebele Bible (iBhayibhili Elingcwele) 1978

Ukudumisa iNkosi

1Jabulani eNkosini, lina abalungileyo.

Ukudumisa kubafanele abaqotho.

2Dumisani iNkosi ngechacho,

lihlabelele kuyo ngechacho elilentambo ezilitshumi.

3Ihlabeleleni ingoma entsha,

litshaye kuhle ngenhlokomo.

4Ilizwi leNkosi liqotho,

wonke umsebenzi wayo wenziwe ngobuqotho.

5Ithanda ukulunga lokwahlulela;

umhlaba ugcwele uthando lwayo olungapheliyo.

6Ngelizwi leNkosi enziwa amazulu,

lakho konke okukuwo ngomoya womlomo wayo.

7Ibuthelela amanzi olwandle kungathi asembizeni,

ifake ulwandle esiphaleni.

8Umhlaba wonke kawuyesabe iNkosi,

bonke abakhileyo emhlabeni kabathuthumele phambi kwayo.

9Ngoba yakhuluma, umhlaba waba khona,

yalaya, wema waqina.

10INkosi ichitha icebo lezizwe,

iphuthisa imicabango yabantu.

11Kanti icebo leNkosi limi kuze kube nininini,

lemicabango yenhliziyo yayo kuzo zonke izizukulwana.

12Sibusisiwe isizwe esiNkulunkulu waso yiNkosi,

abantu ebakhethileyo baba ngabayo.

13INkosi iyakhangela phansi isezulwini,

ibabone bonke abantu;

14isendaweni lapho ihlala khona

iyabakhangela bonke abakhileyo emhlabeni,

15yona eyenza inhliziyo zabo bonke,

iqaphelise zonke izenzo zabo.

16Kayikho inkosi esizwa yibukhulu bempi yayo,

leqhawe kalikhululwa ngamandla alo amakhulu.

17Ibhiza liyize ekunqobeni,

kalisizi ngamandla alo amakhulu.

18Khangela, ilihlo leNkosi liphezu kwabayesabayo,

kwalabo abathemba othandweni lwayo olungapheliyo,

19ukuba ikhulule imiphefumulo yabo ekufeni,

ibaphilise endlaleni.

20Sithemba iNkosi;

yona ilusizo lwethu lesihlangu sethu.

21Inhliziyo zethu ziyathokoza ngayo,

ngoba siyathemba ebizweni layo elingcwele.

22Uthando lwakho olungapheliyo, Nkosi,

kalube phezu kwethu njengokuba sithemba kuwe.