Dute 17 - Ndebele Bible (iBhayibhili Elingcwele) 1978

1Lingahlabeli iNkosi uNkulunkulu wenu inkabi lemvu elesici loba elenye into embi, ngoba lokhu kuyisinengiso eNkosini uNkulunkulu wenu.

2Uba kukhona phakathi kwenu, emizini yenu iNkosi uNkulunkulu wenu elinika yona, owesilisa loba owesifazana owenza okubi emehlweni eNkosi uNkulunkulu wenu ngokwaphula isivumelwano sayo,

3osuke ayekhonza abanye onkulunkulu, akhothamele loba ilanga lenyanga, ingabe enye yezinkanyezi esezulwini, enze lokho iNkosi elinqabele khona,

8Uba kulethwa kini indaba elahlulayo ekwahluleleni kwenu, indaba yokubulala, loba eyelungelo lomuntu, loba eyokutshayana, loba izindaba zokuphikisana emizini yenu, lizakusuka liye endaweni iNkosi uNkulunkulu wenu ezakuyikhetha,

9liye kubapristi abangamaLevi lakumahluleli ozakuba ekhona ngalezonsuku, libabikele ukuze balitshele isiqumo sabo sokwahlulela.

10Lizakwenza njengesiqumo sabo abazakulitshela sona endaweni iNkosi ezayikhetha; linanzelele ukwenza konke njengokulilaya kwabo;

11lenze njengokulitshela kwabo lanjengesiqumo abalitshela sona; lingaphambukeli ngakwesokunene langakwesokhohlo kwesiqumo abalitshela sona.

12Umuntu oziqhenyayo ongalaleli umpristi ophetheyo inkonzo phambi kweNkosi uNkulunkulu wenu, longalaleli umahluleli, uzakubulawa. Ngalokhu lizakuqeda ububi koIsrayeli.

13Bonke abantu bazakuzwa, besabe, bangaphindi ukuziqhenya.

Imilayezo ngenkosi

14Lapho selifikile elizweni iNkosi uNkulunkulu wenu elinika lona ukuba libe ngelenu, lihlale kilo, beselisithi: Asizibekele inkosi njengazo zonke izizwe ezisizingelezeleyo;1 Sam 8:5

15kumele ukuba libeke umuntu ozakukhethwa yiNkosi uNkulunkulu wenu ukuba yinkosi yenu; umuntu wakini limbeke abe yinkosi yenu; lingabeki owezizweni ongesuye wakini.

16Qaphelani ukuba angabi lamabhiza amanengi lokuba angababuyiseli abantu eGibithe ukuze andise amabhiza akhe, lokhu iNkosi ithe kini: Kalisoze libuyele futhi ngaleyondlela.1 Kho 10:28; 2 Lan 1:16; 9:28

17Futhi angathathi abafazi abanengi, funa inhliziyo yakhe iduhe; njalo angazinothisi ngesiliva langegolide.1 Kho 11:1–8; 10:14–22, 27; 2 Lan 1:15; 9:27

18Kuzakuthi nxa ebekwa esihlalweni sakhe sobukhosi azilobele lumlayo encwadini, alobe lawomazwi asencwadini ephethwe ngabapristi abangamaLevi.

19Uzakuhlala elayo, ayibale insuku zonke zokuphila kwakhe, ukuba afunde ukuyesaba iNkosi uNkulunkulu wakhe, agcine wonke amazwi alumlayo lezimiso lezi, azenze,

20ukuze inhliziyo yakhe ingazikhukhumezi phezu kwabakibo, angaphambuki emithethweni aye ngakwesokunene loba ngakwesokhohlo, aphile isikhathi eside embusweni wakhe wakoIsrayeli, yena labantwana bakhe.