Hez 7 - Ndebele Bible (iBhayibhili Elingcwele) 1978

Ukuphela sekufika

1Ilizwi leNkosi lafika kimi lathi:

2Ndoda, mina Nkosi uNkulunkulu ngithi elizweni lakoIsrayeli: Ukuphela kuyeza, ukuphela kuyeza emagumbini womane elizwe.

3Ukuphela sekufikile kini, ngizakwehlisela ukuthukuthela kwami phezu kwenu, ngilithonisise ngezenzo zenu, ngehlisele phezu kwenu amanyala enu.

4Kangiyikuliyekela, kangiyikulihawukela, kodwa ngizalitshaya ngenxa yezindlela zenu lapho amanyala enu esephakathi kwenu. Ng’khona lizakwazi ukuba ngiyiNkosi.

5INkosi uNkulunkulu ithi: Ukuchitheka kulandela ukuchitheka. Nanku, kuyeza.

6Ukuphela sekufikile, ukuphela sekufikile, sekulehlele; nanko, kuyeza.

7Ukuchitheka kwakho sekufikile, wena owakhileyo elizweni; isikhathi sesifikile, losuku lusondele, usuku lokukhala olungesilo usuku lomsindo wokuthokoza phezu kwezintaba.

8Ngizakwehlisela ulaka lwami phezu kwenu, ngiqedele ukuthukuthela kwami kini, ngilithonisise ngokufanele indlela zenu, ngilitshaye ngenxa yawo wonke amanyala enu.

9Kangiyikuliyekela, kangiyikulihawukela, kodwa ngizalitshaya ngenxa yezenzo zenu langamanyala enu asesephakathi kwenu. Ng’khona lizakwazi ukuba ngiyiNkosi etshayayo.

10Nanto usuku, nantu luyeza. Ukuchitheka kwenu sekufikile, ububi buyahluma, lokuziqhenya kukhahlele,

11isihluku sikhule saba yibubi. Kakuyikusala lutho lwabo, lasenothweni yabo, lasezifuyweni zabo, lasebukhosini babo.

12Isikhathi sesifikile, losuku lusondele. Umthengi kangathokozi, lothengisayo angazisoli, ngoba ulaka lwehlela phezu kwabo bonke.

13Umthengisi kayikubuya azuze lokho akuthengisileyo besaphila bobabili; ngoba okuthengisiweyo kakuyikubuyiselwa ngenxa yesiphithiphithi; futhi kakuyikuba khona umuntu ozakuphila ngenxa yobubi bakhe.

14Selukhalisiwe uphondo, bazilungiselela bonke, kodwa kakho ophumayo ukuya empini, ngoba ukuthukuthela kwami kwehlele phezu kwabo bonke.

15Ngaphandle kukhona impi, ngaphakathi kukhona isifo lendlala; osegangeni ubulawa yimpi, lophakathi komuzi abulawe yindlala lesifo.

16Uba kukhona ababalekela ezintabeni bazakuba njengamajuba avela esihotsheni; bakhale bonke bekhalela ububi babo.

17Zonke izandla zizakuba buthakathaka, lamadolo axege.

18Bonke bazagqoka izambatho zokulila, behlelwe yikwesaba, babanjwe zinhloni, baphuce amakhanda.

19Bazalahlela isiliva sabo ezindleleni, legolide labo lizakuba njengento engcolileyo. Isiliva sabo legolide labo kakuyikuba lamandla okubakhulula ngosuku lokuthukuthela kweNkosi. Kabayikukudla basuthe; ngoba ububi babo buyisikhubekiso sabo.

20Babeziqhenya ngobuhle beziceciso zabo abenza ngazo imifanekiso lezithombe ezinengisayo. Ngakhoke ngizazenza zibe yizinto ezingcolileyo kibo.

21Ngizakuzinikela ezandleni zabezizwe bazithumbe, lakwababi bomhlaba zibe yimpango yabo, bazakuzingcolisa.

22Ngizafihla ubuso bami kibo ukuze bangcolise indawo yami eligugu. Abaphangi bazangena bayingcolise.

23Zilungiselele, ngoba ilizwe ligcwele amacala egazi, lomuzi ugcwele isihluku;

24ngizaletha izizwe ezimbi kakhulu ukuthumba izindlu zabo, ngiqede ukuziqhenya kwabo lamandla abo, kungcoliswe indawo zabo ezingcwele.

25Lapho usizi selufikile, bazadinga ukuthula, kodwa kakuyikuba khona.

26Ukuchitheka kuzalandela ukuchitheka, amahungahunga alandele amanye amahungahunga. Bazadinga umbono kumprofethi, kodwa kakusayikuba khona ukuqondisa kompristi leseluleko sabadala.

27Inkosi izakulila, lezikhulu zigewale ukudana, labantu belizwe bazathuthumela. Ngizakwenza kibo njengokufanele indlela zabo, ngibathonisise njengokufanele izahlulelo zabo; bazakwazi ukuba ngiyiNkosi.