1 Kor 7 - Ndebele Bible (iBhayibhili Elingcwele) 1978

Izeluleko lemithetho yokuthathana

1Mayelana lezinto elaloba ngazo, kuhle ukuba indoda ingamthinti owesifazana.

2Kodwa ngenxa yokuphinga kakube yilowo lalowo abe lowakhe umfazi, ilowo lalowomfazi abe leyakhe indoda.

3Indoda kayimnike umfazi okumfaneleyo; lomfazi enze njalo endodeni.

4Ngoba umfazi kalamandla phezu kowakhe umzimba, kodwa yindoda elawo; ngokunjalo indoda kayilamandla phezu kowayo umzimba, kodwa umfazi ulawo.

5Lingancitshani, kuphela kube ngokwesikhathi ngokuvumelana ukuba lizuze ithuba lokukhuleka, libuye lihlangane futhi, funa uSathane alilinge ngokungazithinti kwenu.

6Lokhu ngikutsho ngemvumo, kangikutsho ngomlayo.

7Bengingathanda ukuba abantu bonke babe njengami; kodwa ilowo lalowo ulesiphiwo sakhe esivela kuNkulunkulu, omunye esolunye uhlobo, lomunye esolunye.

8Kwabangendanga labafelwakazi ngithi: Kuhle kibo uba behlala njengami.

9Kodwa uba bengelakuzithinta, kabende; ngoba kuhle ukwenda kulokutsha ngokufisa.

10Kwabendileyo ngiyabalaya, kungeyisimi kodwa kuyiNkosi, ukuthi umfazi kangahlukani lendoda yakhe;Mat 5:32; 19:9; Mark 10:11, 12; Luka 16:18

11kodwa uba esahlukana layo, kahlale engendanga, kumbe abuyisane lendoda yakhe; lendoda kayingamlahli umkayo.

12Kodwa kwabanye kutsho mina, kakutsho iNkosi, ukuthi uba umzalwane elomfazi ongakholwayo, umfazi evuma ukuhlala laye, yenake angamlahli;

13lomfazi, uba elendoda engakholwayo, indoda ivuma ukuhlala laye, yenake angayitshiyi.

14Ngoba indoda engakholwayo yenziwa ibe ngcwele ngomkayo, lomfazi ongakholwayo wenziwa abe ngcwele ngendoda yakhe. Uba kungenjalo, abantwana benu ngabe kabangcwele; kodwa khathesi bangcwele.

15Kodwa uba ongakholwayo ethanda ukwehlukana lomkakhe, kahlukane laye; kokunjalo umzalwane ingabe umzalwanekazi kabotshwanga. Ngoba uNkulunkulu ulibizile ukuba lihlale ngokuthula.

16Wena mfazi, wazi ngani ukuba ungeyisilise indoda yakho na? Lawe ndoda, wazi ngani ukuba ungemsilise umkakho na?

17Kuphela nje kakube yilowo lalowo ahlale njengokuba iNkosi imabele, lanjengokuba uNkulunkulu embizile. Lokhu kungumlayo wami emabandleni wonke.

18Ukhona yini owabizwa esokile na? Kangabi njengongasokanga. Ukhona yini owabizwa engasokanga na? Kangasoki.

19Ngoba ukusoka kakusilutho, lokungasoki kakusilutho, kuphela ukulondoloza imilayo kaNkulunkulu.

20Kakube yilowo lalowo ahlale kulesosimo abizwa ekuso.

21Wabizwa uyisigqili na? Ungakhathazeki ngalokho. Kodwa uba kungenzeka ukuba ukhululeke, kukhethe lokho.

22Ngoba lowo owabizelwa eNkosini eyisigqili ungokhululekileyo weNkosi. Ngokunjalo lowo owabizwa ekhululekile uyisigqili sikaKristu.

23Lathengwa ngentengo; lingabi yizigqili zabantu.

24Ngakhoke, bazalwane, kakube yilowo lalowo ahlale phambi kukaNkulunkulu ekulesosimo abizwa ekuso.

25Mayelana labangendanga kangilawo umlayo weNkosi, kodwa ngiyeluleka ngokubona kwami njengothembekileyo ngokuhawukelwa yiNkosi.

26Ngithi kuhle lokhu ngenxa yenkathazo ezikhona ukuba umuntu ahlale enjalo.

27Ubotshelwe emfazini na? Ungakudingi ukukhululeka. Ukhululekile kumkakho na? Ungathathi.

28Kodwa uba uthatha, kawoni; lentombi uba isenda, kayoni. Kodwa abanjalo bazakuba lenkathazo emzimbeni; bengithanda ukuliphephisa.

29Ngitsho lokhu, bazalwane, ukuthi isikhathi sesinciphile; ngakho kusukela khathesi abalabafazi kababe njengabangelabo,

30labakhalayo babe njengabangakhaliyo, labathokozayo babe njengabangathokoziyo, labathengayo babe njengabangelalutho,

31labasebenzisa okomhlaba babe njengabangakusebenzisiyo; ngoba isimo salumhlaba siyedlula.

32Ngithanda ukuba lingabi lakukhathazeka. Ongathathanga ukhathalela izinto zeNkosi ukuthi uzakuyithokozisa kanjani.

33Kodwa othetheyo ukhathalela izinto zomhlaba ukuba uzakumthokozisa kanjani umkakhe,

34wehlukene phakathi. Intombi ikhathalela okweNkosi ukuze ibe ngcwele emzimbeni lasemoyeni; kodwa umfazi ukhathalela izinto zomhlaba ukuba angayithokozisa kanjani indoda yakhe.

35Lokhu ngikutsho ukuba kube lusizo kini; kungesikho ukuba ngilivimbele, kodwa ukuba lihambe ngokufaneleyo, libambelele eNkosini lingaphazamiseki.

36Uba umuntu ebona ukuthi uziphatha ngokungafanele entombini yakhe, yona isikhulile, futhi ebona ukuthi kalamandla ukuzithinta, efisa ukuba bathathane, kenze akufunayo; koni; kabathathane.

37Kodwa omiyo eqinile enhliziyweni yakhe, engacindezelwa lutho, elamandla okuzithinta, uba ekumisile lokhu enhliziyweni yakhe ukuthi uzakugcina intombi yakhe iyintombi, uzakwenza kuhle.

38Ngakho lowo oyithathayo intombi yakhe wenza kuhle, kodwa ongayithathiyo wenza kuhle kakhulu.

39Umfazi ubotshelwe endodeni yakhe uba isekhona; kodwa uba isifa, ukhululekile ukuba endele kulowo amthandayo, kodwa ngokufanele iNkosi.

40Kodwa ngokubona kwami ubusisiwe, uba ehlala njengalokho enjalo; lami ngithi ngiloMoya kaNkulunkulu.