Hlu 2 - Ndebele Bible (iBhayibhili Elingcwele) 1978

Isithunywa seNkosi eBokimi

1Isithunywa seNkosi sasuka eGiligali saya eBokimi, sathi: Ngalikhupha eGibithe, ngaliletha elizweni engafunga ukulinika okhokho benu. Ngathi kangisoze ngisaphule isivumelwano sami lani;

2lani kaliyikwenza isivumelwano labakhileyo balelilizwe, lizadiliza ama‐altare abo. Kodwa kaliwulalelanga umlayo wami. Kuyini lokhu elikwenzileyo na?Eks 34:12–13; Dute 7:2–5

3Khathesike ngithi kangiyikubaxotsha phambi kwenu, kodwa bazakuba yizitha zenu, labonkulunkulu babo babe ngumjibila kini.

4Kwathi isithunywa seNkosi sesikhulume lawomazwi kubo bonke abakoIsrayeli, badazuluka bakhala.

5Leyondawo bayibiza ngokuthi liBokimi, bayihlabela iNkosi lapho.

Ukufa kukaJoshuwa

6UJoshuwa esebadabulele abantu, abakoIsrayeli basuka ukuyakwakha elizweni, kwaba yilowo lalowo waya endaweni yakhe.

7Abantu bayikhonza iNkosi kuzo zonke insuku zikaJoshuwa, lezabadala abasalayo ababewubonile umsebenzi omkhulu iNkosi eyawenzela uIsrayeli.

8UJoshuwa indodana kaNuni, inceku yeNkosi, wafa eleminyaka elikhulu letshumi.

9Bamngcwabela endaweni yakhe eTiminathi‐Heresi ezintabeni zakoEfrayimi, ngasenyakatho kwentaba iGashi.Josh 19:49–50

10Laso sonke lesosizukulwana safa, sambelwa kwabakibo; kwavela esinye emva kwaso esasingayazi iNkosi lomsebenzi eyayiwenzele uIsrayeli.

Okubi kukaIsrayeli

11AbakoIsrayeli benza okubi phambi kweNkosi, bakhonza oBali,

12batshiya iNkosi, uNkulunkulu wabokhokho babo, eyabakhupha elizweni laseGibithe, balandela abanye onkulunkulu, onkulunkulu bezizwe ababehlala phakathi kwazo, bakhothama kibo, bayithukuthelisa iNkosi.

13Batshiya iNkosi, bakhonza oBali laboAshera.

14Ngakho ulaka lweNkosi lwavutha kuIsrayeli, yabanikela kubaphangi ababaphangayo; yabanikela emandleni ezitha zabo ezazibahanqa, behluleka ukumelana lazo.

15Loba besiya ngaphi, isandla seNkosi sabenzela okubi njengokutsho kwayo lanjengokufunga kwayo kibo, bahlupheka kakhulu.

Ukumiswa kwabahluleli

16INkosi yasibamisela abahluleli ababophula emandleni alabo ababaphangayo.

17Kanti kababalalelanga abahluleli babo, baphinga ngokukhonza abanye onkulunkulu, bakhothama kibo, baphambuka masinyane endleleni okhokho babo ababehamba kuyo, ababelalele imilayo yeNkosi. Bona kabayilalelanga iNkosi.

18Lapho iNkosi ibamisela umahluleli yayisiba laye, ibophule ezandleni zezitha zabo zonke insuku zomahluleli; ngoba iNkosi yayisiba lesihawu ngokububula kwabo ngenxa yalabo ababahluphayo lababacindezelayo.

19Kodwa kuthi lapho umahluleli esefile, babuyele emuva benze okubi ukwedlula okhokho babo, balandele abanye onkulunkulu, babakhonze bakhothame kibo; kabayekelanga lokukodwa kwezenzo zabo lokwendlela zabo zenkani.

20Ngalokhoke ulaka lweNkosi lwavutha kuIsrayeli, yathi: Ngoba lababantu basaphule isivumelwano sami engasilaya okhokho babo, kabalilalelanga ilizwi lami,

21kangisayikuxotsha phambi kwabo lezozizwe uJoshuwa azitshiya ekufeni kwakhe,

22ukuba ngihlole ngazo uIsrayeli ukuba bazananzelela yini ukuhamba endleleni yeNkosi njengabokhokho babo.

23Ngakho iNkosi yaziyekela lezozizwe, kayaze yazixotsha masinyane, kayizinikelelanga emandleni kaJoshuwa.