Izililo 1 - Ndebele Bible (iBhayibhili Elingcwele) 1978

Usizi lweJerusalema elichithekileyo

1Yeka ukuhlala kwawo wodwa umuzi owawugcwele abantu!

Usunjengomfelwakazi wona owawumkhulu phakathi kwezizwe.

Wona owawuyinkosikazi phakathi komuzi usungobuswayo.

2Uyakhala kakhulu ebusuku,

inyembezi zawo zehla ezihlathini zawo.

Phakathi kwazo zonke izithandwa zawo kakho owududuzayo.

Bonke abangane bawo bawuphethe ngenkohliso,

sebeyizitha zawo.

3UJuda wathunjwa waya kwezinye izizwe ngenxa yokuhlupheka lobugqili obukhulu.

Usehlezi phakathi kwezizwe, kafumani ukuphumula.

Bonke abamzingelayo bamficile ephakathi kobuhlungu.

4Imigwaqo eya eZiyone iyalila,

ngoba kakho ozayo kulo emikhosini emisiweyo.

Emasangweni alo kakulabantu, labapristi balo bayabubula.

Intombi zalo ziyahlupheka.

Liyahlupheka kakhulu.

5Izitha zalo sezilibusa, ziyaphumelela,

ngoba iNkosi ilenze lahlupheka ngenxa yobunengi beziphambeko zalo.

Abantwana balo bathunjiwe yizitha.

6Bonke ubukhosi buphelile eZiyone.

Izikhulu zalo sezinjengezimpala ezingafumani idlelo,

zibalekile zingelamandla phambi kwabazixotshayo.

7IJerusalema liyakhumbula ensukwini zokuhlupheka lezosizi lwalo konke okuhle okwakukhona ensukwini zasendulo.

Nxa abantu balo bewela ezandleni zesitha, kwakungekho olisizayo;

isitha sathokoza ngalo, sahleka ukuchitheka kwalo.

8IJerusalema lonile kakhulu, ngakho seliyisinengiso.

Bonke ababelihlonipha sebelidelela,

ngoba sebebonile ubuze balo.

Yebo, selibubula, likhangele eceleni.

9Ukungcola kwalo kwakusezidwabeni zalo,

kalikhumbulanga ngokuchitheka kwalo.

Ngakhoke ukuwa kwalo kukhulu,

kalilaye umduduzi.

Nkosi, akukhangele ukuhlupheka kwalo,

ngoba isitha sesinqobile.

10Isitha selula izandla zaso ukuthatha konke okuhle kwalo.

Libonile izizwe zihlasela indlu yalo engcwele,

zona owazalela ukungena phakathi kwebandla lakho.

11Bonke abantu balo bayabubula bedinga ukudla;

banike okuligugu kwalo ngokudla ukuba baqinise amandla abo.

Nkosi, ake ukhangele ngoba mina Jerusalema ngiyadelelwa.

12Kakusilutho kini yini lonke elidlulayo na?

Khangelani libone ukuba kukhona yini usizi olunjengolwami,

olwehliselwe phezu kwami,

iNkosi engehlisele lona osukwini lokuthukuthela kwayo.

13Iphezulu ithumele umlilo,

yawehlisela emathanjeni ami.

Yathiya inyawo zami ngembule,

yangibuyisela emuva.

Yangitshiya ngithithibele, ngiphele amandla usuku lonke.

14Iziphambeko zami zabotshelwa kimi,

isandla sayo sazithandela kimi.

Ijogwe layo lafakwa entanyeni yami,

ngaphela amandla ngenxa yobunzima balo.

INkosi yangiyekelela kilo, ngahluleka ukuma.

15INkosi yeyisile wonke amaqhawe ami phakathi kwami,

yaletha impi ukubulala insizwa zami.

INkosi inyathele uJuda njengasesikhamelweni sewayini.

16Ngiyakhala ngenxa yalokho,

amehlo ami ajuluka inyembezi;

ngoba umduduzi ukhatshana lami obezakungimisa isibindi.

Abantwana bami bachithekile ngoba isitha sinqobile.

17IZiyone liyelula izandla zalo ukukhuleka,

kodwa kakho oliduduzayo.

INkosi ilayile ngoJakobe ukuthi abakhelene laye babe yizitha zakhe.

IJerusalema seliyisinengiso phakathi kwabo.

18INkosi ilungile, ngoba ngilihlamukile ilizwi layo.

Kodwa ake lizwe, bantu lonke,

libone ukuhlupheka kwami.

Intombi zami lensizwa zami zithunjiwe.

19Ngabiza izithandwa zami, kodwa zangikhohlisa.

Abapristi labadala bami bafela phakathi komuzi,

besadinga ukudla ukuba baqinise amandla abo.

20Ake ukhangele, Nkosi, ngoba sengihluphekile,

imibilini yami idungekile,

inhliziyo yami ikhathazekile phakathi kwami,

ngoba ngihlamukile kakhulu.

Phandle ngumkhonto obulalayo,

endlini yikufa.

21Ake uzwe ukububula kwami, kakho ongiduduzayo.

Zonke izitha zami zizwile ngokuhlupheka kwami,

ziyathokoziswa yikuthi nguwe okwenzileyo.

Lufikise usuku osulumemezile,

uzenze ukuba zibe njengami.

22Kakufike bonke ububi bazo phambi kwakho,

wenze kizo njengokwenza kwakho kimi ngenxa yazo zonke iziphambeko zami.

Ngoba ukububula kwami kukhulu,

lenhliziyo yami ikhathele.