uAmosi 7 - Ndebele Bible (iBhayibhili Elingcwele) 1978

UAmosi utshengiswa isikhongwane lomlilo lentambo yokumisa

1INkosi uNkulunkulu yangitshengisa lokhu; yenza isikhongwane ekuhlumeni kotshani bamuva, kwakungutshani bamuva emva kokusikwa kotshani benkosi.

2Kwathi lapho sesidlile utshani belizwe, ngathi:

Nkosi Nkulunkulu, ake uthethelele, ngiyakuncenga.

Uzaphepha kanjani uJakobe emncinyane kangaka?

3INkosi yazisola ngalokhu, yathi: Lokhu kakuyikwenzeka.

4INkosi uNkulunkulu yasingitshengisa lokhu; yehlisa umlilo ukwahlulela ngawo, owaqothula amanzi amanengi, owawusuzakuqeda ilizwe.

5Ngasengisithi:

Nkosi Nkulunkulu, ake ume, ngiyakuncenga.

Uzaphepha kanjani uJakobe emncinyane kangaka?

6INkosi yazisola ngalokhu, yathi: Lokhu lakho kakuyikwenzeka.

7Yasingitshengisa lokhu; iNkosi yayimi ngasemdulini owakhiwa ngentambo yokumisa iphethe intambo yokumisa esandleni sayo.

8Yathi kimi: Amosi, ubonani na? Ngathi: Ngibona intambo yokumisa. INkosi yasisithi:

Khangela, ngiyabeka intambo yokumisa phakathi kwabantu bami uIsrayeli;

kangisayikubayekela futhi;

9indawo eziphakemeyo zokukhonzela zikaIsaka zizavalwa,

lezindlu ezingcwele zakoIsrayeli zizadilizwa;

ngizakuyivukela indlu kaJerobowamu ngomkhonto.

UAmaziya loAmosi

10UAmaziya umpristi waseBetheli wasethumela ilizwi kuJerobowamu inkosi yakoIsrayeli, wathi: UAmosi ukuvusela abantu bakoIsrayeli, lelizwe kalilakuwamela wonke amazwi akhe.

11Ngoba uAmosi uthe: UJerobowamu uzabulawa yimpi, loIsrayeli athunjelwe elizweni elikhatshana.

12UAmaziya wasesithi kuAmosi: Wena mboni, hamba ubalekele elizweni lakoJuda, udle ukudla khona, utshumayele lapho,

13ungatshumayeli futhi eBetheli, ngoba liyindlu yokukhonzela yenkosi lethempeli lombuso.

14UAmosi wasemphendula uAmaziya esithi: Kangisuye umprofethi mina, futhi kangisindodana yomprofethi; kodwa ngingumalusi lomhlanyeli wezihlahla zephane.

15INkosi yangithatha ekwaluseni, yathi kimi: Hamba uyetshumayela ebantwini bami uIsrayeli.

16Ngakhoke zwana ilizwi leNkosi. Wena uthi: Ungatshumayeli ngoIsrayeli, ungakhulumi ngendlu kaIsaka.

17INkosi yona ithi:

Umkakho uzakuba liwule phakathi komuzi;

amadodana lamadodakazi akho azabulawa yimpi,

lelizwe lakini lizadatshulwa phakathi ngentambo;

wenake uzakufela elizweni elingcolileyo,

uIsrayeli athunjelwe elizweni elikhatshana.