Hubo 28 - Ndebele Bible (iBhayibhili Elingcwele) 1978

Umkhuleko wokucela ukusizwa lowokubonga ngokusizwa

1Ngiyakhala kuwe, Nkosi;

dwala lami, ungangivaleli indlebe,

funa kuthi uba uthula, ngibe njengalabo abafileyo.

2Zwana ilizwi lokunxusa kwami lapho ngikhala kuwe,

lapho ngiphakamisela izandla zami

ngasendaweni yakho engcwele.

3Ungangikhukhuli kanye lababi lalabo abenza okubi,

abakhuluma kuhle labomakhelwana babo,

kanti kukhona okubi enhliziyweni zabo.

4Ubanike njengokwenza kwabo,

lanjengobubi bezenzo zabo;

ubanike njengokwenza kwezandla zabo,

ubaphindisele abakwenzileyo.

5Ngoba kabayinanzi imisebenzi yeNkosi

lokwenza kwezandla zayo;

izakubabhidliza ingaphindi ibakhe futhi.

6Kayibongwe iNkosi,

ngoba ilizwile ilizwi lokunxusa kwami.

7INkosi ingamandla ami lesihlangu sami;

inhliziyo yami ithemba kuyo;

iyangisiza, ngakho inhliziyo yami iyathokoza,

ngiyibonge ngengoma yami.

8INkosi ingamandla abantu bayo,

iyinqaba yokukhululwa kogcotshiweyo wayo.

9Siza abantu bakho, ubusise isizwe sakho,

ube ngumalusi wabo, ubagcine kuze kube nininini.