uJona 2 - Ndebele Bible (iBhayibhili Elingcwele) 1978

Umkhuleko kaJona wokubonga

1UJona wasekhuleka eNkosini uNkulunkulu wakhe esesiswini senhlanzi,

2esithi:

Ekuhluphekeni kwami ngakhala eNkosini, yangiphendula;

ngisendaweni yabafileyo ngamemeza, wena walizwa ilizwi lami.

3Wangiphosela emanzini amanengi, enzikini yolwandle,

impophoma yangihanqa inxa zonke;

wonke amavinqo lamaza akho edlula phezu kwami.

4Ngasengisithi: Ngixotshiwe ebusweni bakho;

ngizabuya ngilibone kanjani ithempeli lakho elingcwele na?

5Amanzi angihanqileyo asefike entanyeni yami,

amanzi amanengi angisibekela;

ukhula lwathandela ikhanda lami

6ezisekelweni zentaba.

Ngatshona elizweni, imigoqo yalo yangivalela kwaze kwaba nini lanini;

kanti wangikhupha emgodini, Nkosi Nkulunkulu wami.

7Lapho umphefumulo wami uphela amandla, ngayikhumbula iNkosi;

umkhuleko wami wafinyelela kuwe ethempelini lakho elingcwele.

8Labo abakhonza izithombe eziyize balahla ukuthembeka kwabo kuwe.

9Kodwa mina ngizanikela umnikelo ngikudumise ngelizwi lokubonga,

ngigcwalise izithembiso zami;

ukukhulula kungokweNkosi.

10INkosi yakhuluma enhlanzini; inhlanzi yamhlanzela uJona emhlabathini owomileyo.