Isa 56 - Ndebele Bible (iBhayibhili Elingcwele) 1978

Ukubusiswa kwabezizwe ababambelela esivumelwaneni seNkosi

1INkosi ithi:

Nanzelela okufaneleyo, wenze ukulunga,

ngoba ukusilisa kwami kuseduze ukufika,

lokukhulula kwami kuzakubonakaliswa.

2Ubusisiwe umuntu owenza lokhu,

lomuntu ebambelela kukho,

ogcina iSabatha, engaloni,

lothinta isandla sakhe ukuba singenzi okubi.

3Owezizweni ozihlanganise leNkosi kangatsho ukuthi:

Impela iNkosi izakungahlukanisa labantu bayo;

lomthenwa ungatsho ukuthi: Mina ngiyisihlahla esomileyo.

4Ngoba iNkosi ithi:

Abathenwa abagcina amaSabatha ami,

abakhetha ukwenza engikuthandayo,

ababambelela esivumelwaneni sami,

5ngizakubanika endlini yami langaphakathi kwemiduli yami

isikhumbuzo lebizo elingapheliyo elingayikukhohlakala.

6Labezizwe abazihlanganisa leNkosi ukuyikhonza

lokuthanda ibizo layo, babe yizinceku zayo,

bonke abagcina iSabatha, bengaloni,

bebambelela esivumelwaneni sami,

7laba ngizabaletha entabeni yami engcwele,

ngibathokozise endlini yami yokukhulekela;

iminikelo yabo yokutshiswa lemihlatshelo yabo

izakuvunywa ealtareni lami,

ngoba indlu yami izakubizwa ngokuthi

yindlu yokukhulekela yezizwe zonke.

8INkosi uNkulunkulu ebuyisa abathunjiweyo bakoIsrayeli ithi:

Ngisezakubuyisa abanye futhi ngaphandle kwalabo asebebuyisiwe.

Ababusi bakoIsrayeli bonakele

9Lina lonke zilo zeganga, lani lonke zilo zehlathi,

wozani lidle.

10Abalindi bonke bakoIsrayeli bayiziphofu, kabalakwazi;

bonke banjengezinja eziyizimungulu ezingakwaziyo ukukhonkotha;

balala nje baphuphe,

bathanda ubuthongo.

11Banjengezinja eziyizihwaba, ezingasuthiyo;

yebo, bangabelusi abangaziyo;

bonke bazenzela abakuthandayo,

kube yilowo lalowo enanzelela eyakhe inzuzo.

12Bathi: Wozani, ngizakuletha iwayini,

ngilethe lelibukhali silinathe;

lakusasa kuzakuba njalo, kube lenjabulo enkulu.