Hubo 9 - Ndebele Bible (iBhayibhili Elingcwele) 1978

Ukubonga ukwahlulela kukaNkulunkulu

1Ngizakubonga, Nkosi, ngenhliziyo yami yonke,

ngilandise zonke izimangaliso zakho.

2Ngizakuthaba ngithokoze kuwe,

ngidumise ibizo lakho wena oPhezukonke.

3Lapho izitha zami zibuyela emuva, ziyawa,

zibhubhe phambi kwakho.

4Ngoba wena uyimele indaba yami lamalungelo ami,

wahlulela ngokulungileyo uhlezi esihlalweni sakho sobukhosi.

5Uzikhuzile izizwe, wabhubhisa ababi;

walesula ibizo labo kwaze kwaba nininini.

6Izitha zichitheke zaphela nya;

imizi yazo uyidilizile;

kazisayikukhunjulwa lakanye.

7Kodwa iNkosi iyabusa kuze kube nini lanini,

isihlalo sayo sobukhosi isimisele ukwahlulela;

8umhlaba iyawahlulela ngokulunga,

iyabahlulela abantu ngeqiniso.

9INkosi iyinqaba yabacindezelweyo,

iyinqaba ezikhathini zokuhlupheka.

10Abalaziyo ibizo lakho bazakuthemba kuwe,

ngoba wena Nkosi, kawubatshiyanga abakudingayo.

11Hlabelani lidumise iNkosi ehlezi eZiyone,

limemezele phakathi kwabantu izenzo zayo.

12Ngoba yona ephindisela igazi iyabakhumbula,

kayikhohlwa yikukhala kwabahluphekayo.

13Woba lomusa kimi, Nkosi,

ukubone ukuhlutshwa kwami ngabangizondayo,

wena ongilulamisayo ngisemasangweni okufa,

14ukuze ngihube udumo lwakho,

ngithabe emasangweni eZiyone ngokungikhulula kwakho.

15Izizwe ziwele emgodini ezawumbayo,

lenyawo zazo zibanjwe limbule ezalithiyayo.

16INkosi izibonakalisile, yahlulela;

ababi bathiywe emsebenzini wezandla zabo.

17Ababi bazakuya endaweni yabafileyo,

zonke izizwe ezimkhohlwayo uNkulunkulu.

18Ngoba abaswelayo kabayikukhohlakala kokuphela,

lethemba labayanga kaliyikunyamalala kokuphela.

19Vuka, Nkosi, ungavumi ukuba umuntu anqobe;

izizwe kazahlulelwe phambi kwakho.

20Kazitshaywe luvalo, Nkosi,

kazaziswe ukuthi zingabantu nje.