2 Lan 33 - Ndebele Bible (iBhayibhili Elingcwele) 1978

Ukubusa kukaManase

1UManase wayeleminyaka elitshumi lambili lapho eqalisa ukubusa; wabusa iminyaka engamatshumi amahlanu lanhlanu eJerusalema.2 Kho 21:1–26

2Wenza okubi phambi kweNkosi, walingisa amanyala awezizwe iNkosi eyazixotsha phambi kwabakoIsrayeli.Jer 15:4

3Wabuya wakha indawo eziphakemeyo zokukhonzela uyise uHezekiya ayezivalile, wakhela oBali ama‐altare, wamisa insika zikankulunkulukazi uAshera, wadumisa zonke inkanyezi zaphezulu, wazikhonza.

4Wakha ama‐altare ethempelini, indlu iNkosi eyakhuluma ngayo yathi: EJerusalema ibizo lami lizadunyiselwa khona kokuphela.2 Sam 7:13

5Wakhela zonke inkanyezi zaphezulu ama‐altare emagumeni womabili ethempeli.

6Watshisa abantwana bakhe baba ngumnikelo esihotsheni saseBeni‐Hinomu, wavumisa, wenza imilingo lamalumbo, wasebenza labalamadlozi labathakathi. Wenza okubi kakhulu phambi kweNkosi, wayithukuthelisa.

7Isithombe ayesenzile wasimisa endlini kaNkulunkulu, indlu uNkulunkulu akhuluma ngayo kuDavida lakuSolomoni indodana yakhe wathi: Kulindlu, laseJerusalema engilikhethe kuzo zonke izizwe zakoIsrayeli, ibizo lami lizadunyiselwa khona kuze kube nininini;1 Kho 9:3–5; 2 Lan 7:12–18

8kangisayikuzulisa inyawo zabakoIsrayeli ziphume futhi elizweni engalinika okhokho benu, uba bezakunanzelela ukwenza njengokubalaya kwami ngomlayo wonke langezimiso zonke langemithetho eyanikwa ngoMose.

9UManase wamduhisa uJuda labaseJerusalema, benza okubi ukwedlula izizwe iNkosi eyazichitha phambi kwabakoIsrayeli.

10INkosi yakhuluma kuManase lasebantwini bakhe, kodwa kabalalelanga.

11Ngalokhuke iNkosi yabalethela abaphathi bempi yenkosi yaseAsiriya, ababamba uManase ngezingwegwe, bambopha ngezibopho zethusi, bamusa eBabiloni.

12Kwathi esosizini wancenga umusa weNkosi uNkulunkulu wakhe, wazithoba kakhulu phambi kukaNkulunkulu wabokhokho bakhe.

13Wakhuleka kuye, uNkulunkulu wezwa ukuncenga lokukhuleka kwakhe, wambuyisela eJerusalema embusweni wakhe. UManase wazike ukuba iNkosi inguNkulunkulu.

14Ngemva kwalokho wakha umduli ongaphandle komuzi kaDavida ngasentshonalanga kweGihoni esihotsheni, wawufikisa ngaseSangweni leNhlanzi, wawubhodisa iOfeli, wawenza waphakama kakhulu. Wabeka labaphathi bamabutho kuyo yonke imizi ebiyelweyo yakoJuda.

15Wasusa onkulunkulu bezizweni lesithombe ethempelini, lama‐altare ayewakhile entabeni yethempeli lawaseJerusalema, wakuphosela ngaphandle komuzi.

16Wabuyisela lealtare leNkosi, wanikela phezu kwalo iminikelo yokuthula leyokubonga. Walaya uJuda ukuba akhonze iNkosi, uNkulunkulu kaIsrayeli.

17Kodwake abantu babelokhu benikela endaweni eziphakemeyo zokukhonzela, kodwa kuphela eNkosini uNkulunkulu wabo.

18Ezinye indaba zikaManase, lomkhuleko wakhe kuNkulunkulu wakhe, lamazwi ababoni abawakhuluma kuye ngebizo leNkosi uNkulunkulu kaIsrayeli, kulotshiwe ogwalweni lwezindaba zamakhosi akoIsrayeli.

19Umkhuleko wakhe, lokuthi uNkulunkulu wakwamukela kanjani ukuncenga kwakhe, lesono sakhe sonke, lokungathembeki kwakhe, lezindawo amisa kuzo indawo eziphakemeyo zokukhonzela, lensika zikankulunkulukazi uAshera, lezithombe, engakazithobi, konke kulotshiwe ogwalweni lwezindaba zababoni.

20UManase wasesiya kwabaphansi, wangcwatshelwa endlini yakhe. UAmoni indodana yakhe waba yinkosi esikhundleni sakhe.

Ukubusa kukaAmoni

21UAmoni wayeleminyaka engamatshumi amabili lambili lapho eqalisa ukubusa; wabusa iminyaka emibili eJerusalema.

22Wenza okubi phambi kweNkosi njengokwenza kukayise uManase; wahlabela zonke izithombe uyise uManase ayezenzile, wazikhonza.

23Kazithobanga phambi kweNkosi njengoyise uManase, kodwa uAmoni lo wenza amacala ngamacala.

24Inceku zakhe zamenzela icebo, zambulala endlini yakhe.

25Kodwa abantu belizwe babulala bonke labo ababenzele inkosi uAmoni icebo, babeka uJosiya indodana yakhe ukuba abe yinkosi esikhundleni sakhe.